Radıo jýrnalıstıka salasynda uzaq jyl qyzmet etken Ǵalııa Qusaıynqyzy kópshilikke «Árbir úıge radıo qajet», «Tyǵdyrlardy biriktirgen – Qazaqstan», «Ultyn ulyqtaǵan asyl ana», «О́mir shyńy» eńbekterimen tanys. Al bıyl jaryqqa shyqqan «Tulǵalar – ǵajap jandar» kitaby – jýrnalıstıkadaǵy izdenis izderinen týǵan mazmundy týyndy. Munda ult rýhanııatyna súbeli úles qosqan qaıratker azamattardyń kisilik kelbeti, degdar bolmysy haqynda baıandalady. «Tulǵalyq tuǵyrǵa kimder laıyq?» degen suraǵymyzǵa avtor bylaı dep jaýap bergen edi:
«Tulǵa dep ómirdiń barlyq qıyndyǵy men jaqsylyǵyn kórgen, aq pen qarany ajyrata alatyn, óziniń ár is-áreketterine jaýap beretin, ózi jeke sheshim qabyldaıtyn, aldyna qoıǵan maqsattaryna jetetin adam dep túsinemin. Tulǵa basqa adamdarǵa uqsamaıdy. Olardyń ómirge degen kózqarasy erekshe. Ondaı jandar kóptiń biri emes. Onyń derbes pikiri bar. Ol – basqanyń jeteginde júrmeıdi, kerisinshe sońynan kópshilikti erte biletin adam. О́ıtkeni onyń boıynda kóshbasshylyq qasıet bar. Osyndaı jandar qazirgi qoǵamǵa kerek. Sol sebepti ilgeridegi jáne ózim kórgen, moıyndaǵan tulǵalardyń ǵıbratty ǵumyryn qaǵazǵa túsirýdi maqsat ettim»,
dedi Ǵ. Baltabaı.
Avtor kitabynda belgili Isa Baızaqov, Farıza Ońǵarsynova, «qazaqtyń Levıtany» atanǵan Ánýarbek Baıjanbaev syndy tulǵalardyń ómiri men shyǵarmashylyǵynan bastap kópshilikke beımálim alǵashqy teatr aktrısasynyń biri Shárbaný Baızaqova, alǵashqy qazaq jýrnalıst qyzdarynyń biri Lázıza Serǵazınanyń taǵylymdy taǵdyryn sóz etedi.
Mazmundy keshte memleket jáne qoǵam qaıratkeri Rysty Jumabekova, Almaty aýdandyq Ardagerler uıymynyń tóraǵasy Marat Mustafın, ardager-ustaz Erkin Dáýeshuly, basqa da azamattar aqjarma tilekterin aıtyp, kitap avtoryna zor densaýlyq, shyǵarmashylyq tabys tiledi.
