Aýyldyń árin kirgizetin nysandar

«Bıyl Batys Qazaqstan oblysynda bilim berý ınfraqurylymyn qoldaý qory esebinen apatty mektepter másele­sin sheshý maqsatynda Oral qalasyn­da №31 mekteptiń qurylysy bastaldy» deıdi oblystyq qurylys basqarmasy basshysynyń orynbasary Darhan Abdrashıtov. Osy maqsatqa 2,5 mlrd teńge bólinip, merdiger «Altaır» JShS iske kirisip te ketken. Búginde ǵımarattyń qabyrǵasy qalanyp, eden plıtalary ornatylyp jatyr. 

Bir táýiri, áleýmettik ǵıma­rattar birneshe memlekettik baǵdarlama aıasynda salynyp jatyr. Máselen, «Jaıly mektep» ulttyq jobasymen ǵana óńirde 2023-2025 jyldary 18 mektep salynbaq.

Sonyń ishinde ótken jyly 9 mekteptiń qurylysy bas­talyp ta ketti. Olar – Oral qalasyndaǵy №53, №60 jáne №65 mektep ǵımarattary. Soń­­ǵy­­sy medısınalyq kolledj aı­ma­ǵyna salynyp, «Qus fab­rıkasy» dep atalatyn aýdanda turatyn turǵyndardyń balalaryna qyzmet kórsetedi. Buryn saıa­jaı jeri sanalǵan bul aýdan­da búginde myńdaǵan halyq turaqty turǵanymen, dál osy mektep máselesinde kóp jyldan beri qaǵajý kórip kele jatqan edi. Mine, halyqtyń ótinishi eskerildi.

Bórli aýdanynda da 3 «jaıly mektep» boı kóteredi. Onyń ekeýi Aqsaı qalasynda bolsa, endi biri Pýgachevo aýlyndaǵy orta mektep ǵımaraty. Báıterek aýdanynyń Dostyq jáne Baı­qonys aýyldarynda, Terekti aýdanynyń Podstepnoe kentinde de mektep qurylysy bastaldy.

«Bıyl Ulttyq Qordan Batys Qazaqstan oblysynda jańa 9 jaıly mektep qurylysy úshin taǵy da 19,2 mlrd teńge bólindi» degen qýanyshty habardy qurylys bas­qarmasy jáne jarııa etip otyr.

Budan basqa, jaıly mektep­ter­ge syrtqy ınjenerlik jeli­lerdi júrgizý úshin jobalyq-sme­talyq qujat ázirlengen, 8 mektep boıynsha saraptama jasalyp, maquldanǵan, jer­gilikti bıýdjetten 1,5 mlrd teńge bólingen.

Batys Qazaqstan oblysynyń bir ereksheligi – óńirde shaǵyn eldi mekender sany óte kóp. Bul shaǵynjınaqty mektepke úlken suranys týdyryp otyr. Máselen, óńirdegi alpaýyt Qarashyǵanaq Petroleým Opereıtıng b.v. kom­panııasynyń qarajaty ese­­binen Bórli aýdanyndaǵy Jar­sýat aýlynda jáne Qazta­lov aýdanynyń Saraljyn aýlynda shaǵynjınaqty mektep qurylysy júrip jatyr. Taıaý bolashaqta dál osyndaı 8 mektep qurylysy bastalmaq. Qazirgi ýaqytta jobalyq-smetalyq qu­jat­­tar ázirlenip jatyr eken.

Áleýmettik qurylys degende, oǵan tek bilim oshaqtary emes, mádenı-sporttyq nysandar da kiretini anyq qoı. Aýyldyq jerde sporttyq ınfraqurylymdy damytý maqsatynda Qaztalov jáne Tasqala aýdandarynda 2 dene­­shynyqtyrý-saýyqtyrý kesheni salynyp jatyr. Qury­lys­shylar ýádesinde tursa, osy jy­l­dyń III toqsanynda atalǵan aýyl halqy sý jańa sport keshe­ni­niń qyzyǵyn kóre bastaıdy.

Al joǵaryda aıtqan QPO b.v. kompanııasynyń qarajaty esebinen óńirde 4 mádenı-sport kesheni, 2 mádenıet úıi, 2 deneshynyqtyrý-saýyqtyrý kesheni, 5 memlekettik muraǵat salý josparlanǵan.

Aıtpaqshy, «Aýyl – el besigi» dep atalatyn taǵy bir tamasha baǵdarlama bar. Osy ulttyq joba aıasynda búginde oblystyń 5 aýdanynda 6 mádenıet nysany salynyp jatyr. Olar – Qaztalov aýdanynyń Qaıyńdy, Jańaqala aýdanynyń Qyrqopa, Syrym aýdanynyń Toǵanas, Báıterek aýdanynyń Shapov, Tasqala aýdany Mereı aýyldaryndaǵy jańa má­denıet úıi jáne Tasqala aýda­ny ortalyǵyndaǵy murajaı ǵımaraty.

– Bulardan bólek, taǵy da 4 máde­nıet nysany qurylysyn bıyl bastaımyz dep otyrmyz. Osy maqsatqa respýblıka qazy­nasynan – 0,9 mlrd teńge, jergi­likti bıýdjetten – 0,2 mlrd teńge, bar­lyǵy 1,1 mlrd teńge bólindi. Jalpy, jyl sońyna deıin 7 máde­nıet nysany qurylysyn aıaqtap, halyqtyń paıdalanýyna beremiz, – deıdi Darhan Erejepuly.

Áleýmet erekshe kútip júr­gen qurylystyń bir parasy den­saýlyq saqtaý salasyna tıesili. Bıyl Terekti aýdanynda salynyp jatqan 200 oryndyq emhana qurylysyn aıaqtaý úshin Ulttyq qor men jergilikti bıýdjetten qosa alǵanda 0,5 mlrd teńge bólingen edi. Merdiger «Ońdasyn Stroı» JShS qazir jumys ústinde.

Sonymen qatar oblysta ońal­tý ortalyǵynyń qurylysy da jal­ǵa­syp jatyr. Bıyl buǵan 2,2 mlrd teńge bólingen. Merdiger – «Altaır» JShS.

О́ńirde «Aýyldyq densaýlyq saqtaýdy jańǵyrtý» ulttyq jobasy da qyzý júrip jatyr. Osy joba sheńberinde Batys Qazaqstan oblysynyń aýyldyq eldi meken­derinde 2025 jyl­ǵa deıin 50 nysan – alǵashqy medısınalyq-sanıtarlyq kó­mek kórsetetin ambýlatorııa salý josparlanǵan bolatyn. О́tken 2023 jyly óńirde 12 medısına nysany – 4 ambýlatorııa, 8 feldsherlik-akýsherlik pýnkt salynyp, paıdalanýǵa berildi. Onyń keıbiri gazet oqyrmandaryna jaqsy tanys, óıtkeni bul nysandardyń ashylý saltanatyna ózimiz qatysyp, egjeı-tegjeı aqparat bergen bolatynbyz.

Qazirdiń ózinde Jańaqala aýdanynyń Máshteksaı aýlynda, Syrym aýdanynyń Buldyrty aýlynda jergilikti bıýdjet qara­jaty esebinen qurylys bas­ta­lyp ta ketti. Jalpy, 2024 jylǵa arnalǵan jospar boıynsha 38 me­­dısınalyq nysannyń qujaty maquldanyp, 18 nysannyń qury­lys-montaj jumysyn júrgizý úshin respýblıka bıýdjeti ese­bi­nen 2,1 mlrd teńge, jergilik­ti bıýd­jetten 650 mln teńge bólingen eken. Qazir 11 jobanyń merdigeri anyqtaldy, qurylys-montaj jumysy bastaldy. Taǵy 24 joba boıyn­sha merdigerdi anyqtaý úshin baıqaý ótkiziledi.

Bul aıtylǵandardan bó­lek, Oral qalasynda salynyp jatqan ákimshilik ǵımarat qu­ry­lysyn jalǵastyrý úshin jer­gi­likti bıýdjet qarajaty esebi­nen 1,5 mlrd teńge bólingen eken. 2023 jyly bólingen 350,0 mln teńgeni merdiger «Kaz­ConstructionGroup» JShS sáti­men ıgergen bolatyn. Jumys jal­ǵa­sady.

Aıtpaqshy, Terekti aýdanynda 99250 áskerı bóliminiń áskerı qalashyǵy qurylysy bastalǵan. Sondaı-aq Bókeı ordasy aýda­nynyń ortalyǵy Saıhyn aýlynda da jańa ákimshilik ǵımarat boı kóterip jatyr. Bulardyń bári eldiń, óńirdiń áleýmettik turmysyn jaqsartýǵa erekshe serpin bereri anyq.

Batys Qazaqstan oblysy