Ulttyq ulan jas ofıserlermen tolyqty

Kýrsant formasyn kıgen kileń uzyn boıly, jalyndy jas jigitter kóshelerde patrýldik qyzmet atqaryp júrgeni belderine qamshy ilip, álem-jálem kıinip júrgenderdiń mysyn basyp, tynyshtyq pen tártip ornaı bastady. Sodan beri kýrsanttar soltústiktiń barlyq tótenshe isterine de belsene qatystyrylyp, kómek qolyn sozyp keledi. Bıylǵy tasqyn kezinde de olar aldyńǵy shepten tabylyp, júzdegen adamdy qutqarýǵa qatysty.

Qazir bul oqý oryny Ulttyq ulan akademııasy dep atalady. Oblys orta­lyǵynda ótkiziletin barlyq mádenı is-sharanyń, patrıottyq isterdiń bel ortasynan akademııanyń kýrsanttary tabylyp, belsene qatysyp jatady. Sondyqtan oblystyń mádenıet, ishki saıasat, bilim berý basqarmalary, qala turǵyndary kýrsanttarǵa únemi rızashylyǵyn bildiredi. Keıde qystyń qysqa kúninde qarańǵy kóshelermen qorqa soǵyp jaıaý kele jatsań qalyń qara ton kıip, kezekshilikte júrgen úsh kýrsant aldyńnan shyǵa kelgende kádimgideı qýanyp qalasyń. Keıbir aıǵaı-shý shyǵaryp, buzaqylyq kór­setip jatqan áýmeserlerdiń qolyn burap, polısııanyń kóligine apara jatqandaryn da kórip rıza bolasyń.

Búgingi tańda akademııany polkovnık Artýr Toqyshev basqarady. Munda quqyq qorǵaý salasynyń 8 mamandyǵy boıynsha ofıserler daıarlanady. Oqý ornynyń 28 jyldyq tarıhyndaǵy qol jetken tabystary óte mol. Oqý ordasyn bitirgen tórt myńnan artyq túlek elimizdiń ár túkpirinde halyqtyń tynyshtyǵy men bostandyǵyn saqtaýǵa zor úles qosyp keledi. Mádenıet, sport salalaryndaǵy tabystary da az emes.

Oqý orny ózderiniń alǵashqy túlek­terin 2000 jyly ushyrdy. Al bıyl 190 adamnan turatyn 24-túlekterin Qazaqstannyń barlyq óńiri men qalasyna shyǵaryp salyp otyr. Azamattardyń dıp­lom alý saltanatyna Ishki ister mı­nıstri Erjan Sádenov, oblys ákimi Ǵaýez Nur­muhambetov, Ulttyq ulannyń bas qol­bas­shysy, general-leıtenant Erkin Bota­qanov, respýblıkanyń túkpir-túkpi­rinen kelgen ata-analar men týys­tary qatysty. Qonaqtardyń arasynda Tájik­stan Ishki ister mınıstrliginiń ókilderi de boldy. О́ıtkeni bıyl dıplom alǵan ofıserlerdiń 10-y úkimet­aralyq kelisim boıynsha sol elden kelip, oqyǵan­dar edi.

Jalyndy jastardyń búgingi qýa­nysh­tary erekshe seziledi. Minberge kóterilgen Ishki ister mınıstri sózin aldymen balalaryn Otanymyzdyń adal azamaty qylyp tárbıelegen ata-analarǵa alǵys aıtý­dan bastady. «Elimizdiń ishki tártibin baqy­laýǵa uldaryn attandyrǵan, onyń qıyn­dyǵy men táýekelin eńserýge tárbıe­legen ata-analarǵa myń alǵys aıtamyn. Mine, búgin elimizdiń ishki ister áskeriniń ofıserlik korpýsy jańa leıtenanttarmen tolyǵyp otyr. Akademııadan alǵan tereń bilimderińdi, kásibı jáne áskerı daıyndyqtaryńdy elimizdiń quqylyq jáne tártip qýatyn arttyrýǵa jumsaıdy dep senemin», dedi ol.

Jas ofıserlerdi oblys ákimi Ǵaýez Nurmuhambetov te quttyqtady. О́ńir basshysy sózin kýrsanttardyń bıylǵy sý tasqyny kezindegi erligine rızashylyǵyn bildirýden bastady. «Sarbazdar úılerdi qalpyna kel­tirýge jáne zardap shekkenderge úılerine tez oralýyna óz úlesterin qosty. Osynyń arqasynda kóptegen adamnyń ómirin saqtap qaldyq. Sol­tústikqazaqstandyqtardyń atynan sizderge alǵysymdy aıtamyn. Er azamat osyndaı qıyn sátterde shyńdalady. Sizder naǵyz erlik tanytyp, abyroıly eńbek ettińizder. Erim deıtin el aman bolyp, elim deıtin sarbazdar kóp bolsyn», dedi ákim quttyqtaý sózinde.

Dıplomdardy saltanatty jaǵdaıda tap­­syrý rásimi akademııany úzdik bitirgen Abylaıhan Aıtýarov, Jalǵas Jeńis, Tımýr Aǵybaev, Dıas Ábilákimov – tór­­­­teýine Prezıdent Q.Toqaev­tyń atynan Ishki ister mınıstri, general-leıte­nant Erjan Sádenovtiń tapsyrýymen bas­tal­dy.

Akademııanyń jas túlekteriniń biri Ǵalymjan Kenesaryny áńgimege tartqa­ny­myzda, ol óziniń qýanyshty ekenin jet­kizdi. «Búgin armanym oryndalyp, ıyǵyma leıtenant pogonyn taǵyp tur­myn. Tórt jyl boıy osy sátti ańsa­ǵan edim. Qyzyljar óńiri meniń esimde árqashan saqtalady. Osy qalaǵa bala bolyp kelip, tereń bilim men ómirlik tájirıbe alyp, jigit bolyp atta­­nyp bara jatyrmyn», dedi Ǵalymjan.

«Mundaǵy oqý ońaı bolǵan joq. Tórt jyl boıy kazarmada, qatań tártipte bol­dyq. Tártip bolmasa nátıje de bolmaı­dy, sondyqtan ustazdarymyz bizdiń bo­sań­sýymyzǵa erik bergen joq. Sonyń ar­qa­synda mine, dıplom alyp, maman ata­­nyp turmyz. Ustazdaryma alǵys bil­dire­­min», dedi taǵy bir túlek Temirhan Per­ne­bek.

Balasynyń dıplom alý rásimine Almaty oblysynan arnaıy kelgen Aq­jar­­qyn Aısaeva da óziniń qatty qýa­nyp turǵanyn bildirdi. «Tórt jyl boıy oqy­ǵan bilimin balam endi eldiń qyz­me­tine adal jumsasyn dep tileımin. Ota­ny­myz­daǵy tynyshtyqty osy azamattar qor­ǵa­masa kim qorǵaıdy. Balamnyń son­daı dá­re­jege jetkenine kózime jas alyp, qýa­nyp turmyn», dedi ana. Sóıtip, eli­miz­­diń ishki ister áskeri jańa ofıserler­men to­lyqty.

PETROPAVL