Tasqyn sý kelip basqanda jalǵyz-aq adam óziniń saqtanbaǵan sebebinen sýǵa ketse, endi sýǵa ózderi baryp túskender arasynan aınalasy 4 kúnde úsh adamnyń sýǵa ketkeni oblys basshylary men tótenshe jaǵdaı qyzmetin tuıyqqa tirep otyr. Osyǵan oraı oblys ákimi Ǵaýez Nurmuhambetov sýǵa túsý qaýipsizdigin qamtamasyz etý máseleleri boıynsha shuǵyl keńes ótkizdi. Aımaq basshysy soltústikqazaqstandyqtarǵa sýǵa shomylý kezinde qaýipsizdik erejelerin qatań saqtaý týraly úndeý jarııalady. «Qaıǵyly oqıǵalardyń negizgi sebepteri jabdyqtalmaǵan jerlerde sýǵa túsý, mas kúıinde shomylý jáne balalarǵa qadaǵalaýdyń bolmaýynan. Oblys boıynsha jappaı shomylý úshin barlyǵy 60 oryn anyqtalǵan. Sýǵa túsý maýsymyn qaýipsiz ótkizý úshin aýdandar men Petropavl qalasynyń ákimderine arnaıy jabdyqtalmaǵan qaýipti jerlerge tyıym salatyn jáne eskertetin belgiler ornatýdy tapsyramyn», dedi Ǵ.Nurmuhambetov. Sonymen qatar ol qutqarý qyzmetine Polısııa departamenti jáne Ulttyq ulanynyń bólimshelerimen birlese otyryp, 6637 áskerı bólimi jeke quramynyń patrýldik marshrýttaryn sý qoımalaryndaǵy kópshilik demalys oryndaryna barynsha jaqyndatýdy tapsyrdy. Sondaı-aq oblys ákimi barlyq jaýapty memlekettik organdarǵa turǵyndarmen aldyn ala jumysty kúsheıtýdi jáne profılaktıkalyq aqparatty habardar etý jáne taratý maqsatynda WhatsApp toptarymen turaqty aqparattyq ózara is-qımyldy qamtamasyz etýdi júktedi.
Qazir TJ qyzmetkerleri sýǵa túsýge ruqsat etilmegen jerlerdi kún saıyn baqylaýǵa alǵan. Sý jaǵasyna kelgen adamdardyń bárine qaýipsizdik sharalary týraly da aıtylyp otyrady. Bul jumystardy reıdter júrgizý arqyly da jasaıdy. Oǵan daýys shyǵaratyn drondar qoldanylyp, eskertýlerin aıtýdaı-aq aıtýda. TJD baspasóz qyzmeti búginge deıin halyqqa 2 300 ret shyǵyp, sý qaýipsizdigi týraly baıandaǵandaryn jetkizdi.
О́zenge batyp ketkender arasynan búginge deıin 2014 jyly týǵan balanyń denesi áli tabylǵan joq. On jastaǵy bala úlkenderdiń qaraýynsyz ruqsat etilmegen jerge sýǵa túsken eken. Janyndaǵy balalar onyń «battym» degen aıǵaıyn ǵana estip qalypty. Qazir ony izdeýge TJD 52 qyzmetkeri sýǵa júzetin 5 tehnıkasymen jumyldyryldy. Tehnıkalar qatarynda sý asty drony da bar. Sonymen birge volonterler men polısııa qyzmetkerleri de izdeý jumystaryna tartylǵyn.
Aıta ketetin jaıt, Petropavl qalasynyń sanıtarlyq-epıdemıologııalyq baqylaý basqarmasy osy ýaqytqa deıin qala irgesindegi Pestroe kóli jáne Esil ózeni jaǵajaılarynyń sýlarynan 24 ret synama alyp, onyń tazalyǵyn teksergen. Synamalar bakterıologııalyq, sanıtarly-hımııalyq, parazıtologııalyq, radıologııalyq jáne vırýsologııalyq kórsetkishter boıynsha zertteldi. Atalǵan qyzmet bastyǵynyń orynbasary Danııar Ospanovtyń aıtýyna qaraǵanda, ázirge eshqandaı zııandy kórsetkishter tabylmaǵan. «Sýdyń quramy qalypty normada. Qalalyqtar sýǵa qoryqpaı shomylýlaryna bolady», dedi ol.
Sý sapasyn baqylaý búkil jaz boıy júrgizilip turatyn kórinedi.
Soltústik Qazaqstan oblysy
