Sýretti túsirgen – Jeńis YSQABAI
«Eki el basshylary saýda-ekonomıkalyq, mádenı jáne gýmanıtarlyq qatynastardy jańa sapalyq deńgeıge kóterdi. Sonyń arqasynda keıingi jyldary Jetisý oblysynda eleýli yntymaqtastyq nátıjelerine qoljetkizildi. Bizdiń óńirdiń Qytaımen jalpy shekarasy shamamen – 563 shaqyrym. Irgeles óńirlermen de qarym-qatynas belsendi damyp keledi. Qytaı iri ekonomıkalyq seriktesimiz, bul rette oblystyń syrtqy taýar aınalymyndaǵy úlesi 89%-dy quraıdy. Máselen, ótken jyly bizdiń oblys pen Shyńjań-Uıǵyr avtonomııalyq aýdany (ShUAA) arasynda baýyrlastyq baılanys ornatý týraly kelisimge, «Qorǵas» halyqaralyq shekara mańy yntymaqtastyq ortalyǵynda (HShYO) qyzmetin úılestirý tetigin qurý jóninde memorandýmǵa, saýda-ekonomıkalyq yntymaqtastyq týraly kelisimge qol qoıyldy», dedi B.Isabaev Qytaı eliniń Almatydaǵy Bas konsýly Szıan Veı bastaǵan delegasııamen kezdesýde.
Ol oblystyń kólik-logıstıkalyq áleýetine erekshe nazar aýdara otyryp, aýyl sharýashylyǵy ónimderin qaıta óńdeý, balamaly energetıka sekildi yntymaqtastyqtyń keleshektegi baǵyttaryna da toqtaldy.
«Qytaımen shekarada 5 keden beketi bar respýblıkadaǵy jalǵyz óńirmiz. Mysaly, 2023 jyly tek «Altynkól» keden beketiniń ózinen 343 myńnan astam kólik quraly ótti. «Dostyq» stansasynda, «Dostyq – Alashankoý» shekaralyq ótkelimen tikeleı jaqyn jerde ótkizý qýaty jylyna 3,9 mln tonna nemese 300 myń konteıner bolatyn kópfýnksıonaldy júk tasymaldaý termınaldary jumys isteıdi. Qazir «Dostyq» stansasynda «Alakól» avtomobıl ótkizý beketin keńeıtý men jańa termınal salý jumystary júrgizilip jatyr. Sonyń nátıjesinde jolaq sany 2-den 6-ǵa deıin, al ótkizý qabileti táýligine 200-den 1 600-ge deıin artady. «Dostyq – Moıynty» temirjol jelisiniń ekinshi jelisin salý iri jobasy «Dostyq» stansasynyń ótkizý qabiletin arttyrýǵa múmkindik beredi. Ekonomıkalyq ósimniń taǵy bir núktesi – «Qorǵas – Shyǵys qaqpasy» arnaıy ekonomıkalyq aımaǵy (AEA). Onyń aýmaǵynda qýaty táýligine 1 400 vagondy óńdeýge jaǵdaı jasaıtyn qurǵaq port jumys isteıdi. Osy rette bizdiń yntymaqtastyǵymyzdyń mańyzdy ınvestısııalyq jobasy retinde «Qazaqstan – Qytaı halyqaralyq qalasy» týraly da aıta ketken jón. Shekara mańy yntymaqtastyǵynyń taǵy bir mańyzdy baǵyty – «Qorǵas» HShYO. Osynyń bárin qorytyndylaı kele, biz birlesken jańa ınvestısııalyq jobalardy, ásirese aýyl sharýashylyǵy ónimderin óńdeý, týrızm, «jasyl» energetıkany damytý salasyndaǵy yntymaqtastyqqa daıyn ekenimizdi aıtqym keledi», dedi B.Isabaev.
Bas konsýl oblys ákimine jyly qabyldaǵany úshin rızashylyǵyn bildirip, bul kezdesý yntymaqtastyqtyń nyǵaıa túskenin aıǵaqtaıtynyn tilge tıek etti. Sondaı-aq Szıan Veı hanym shekara mańyndaǵy yntymaqtastyq aıasyn odan ári keńeıtý máseleleri men múmkindikterine egjeı-tegjeı toqtaldy. Kezdesý barysynda taraptar túrli saladaǵy birlesken jobalardy iske asyrýǵa, sondaı-aq áriptestik baılanysty jan-jaqty keńeıtýge daıyn ekenin bildirdi. Budan soń delegasııa Taldyqorǵan qalasyndaǵy Dostyq úıimen, Alakól aýdanyndaǵy «Dostyq» beketindegi ótkizý pýnktimen tanysty.
Jetisý oblysy
