Jańa úı alǵan adamdardyń qýanyshynda shek joq. Bul úılerdiń alǵashqy 53-ke qaraǵanda artyqshylyǵy da bar – ot jaǵatyn peshi úıde emes, dalada, úı irgesinde ornalastyrylǵan. Sonymen birge úılerdiń keńdigi burynǵyǵa qaraǵanda 8 sharshy metrge artyq.
Sóıtip, jańa «Birlik» shaǵyn aýdanyna salynbaqshy 700 úıdiń 100-niń kilti tapsyryldy. Prezıdenttiń tapsyrmasy kezeń-kezeńmen oryndalyp keledi. Demeýshilerdiń qoldaýymen qalǵan úılerdiń qurylystary da qyzý júrgizilip keledi. Sonymen birge munda mektep, balabaqsha, emhana, dárigerlik beketter qurylysy da júrgiziledi. Balabaqshanyń qabyrǵalary qazirdiń ózinde kóterilip qalǵan. Munda keletin avtobýs baǵyttary da kóbeıgen.
Úı alǵandardyń biri – Natalıa Naýmenkonyń otbasy. Qaıtys bolǵan qyzynyń úsh balasyn ósirip otyrǵan keıýana bıyl úılerin sý basyp, dalada qalǵanda kóz jasyna ıe bola almaǵanyn aıtady. «Úı salyp beremiz, dalada qaldyrmaımyz» degen sózge qýanǵanymyzben, ol úı qashan bitedi, jaz boıy qaıda turamyz degen ýaıymnan aryla almadym. Endi, mine, jazdyń basynda-aq tamasha úıge qonystandyq. Balalardyń oınaýyna aýlasy qandaı keń. Prezıdentke aıtar alǵysym sheksiz, ýádesin dál ýaqytynda oryndady. Endi jaz boıy úıimizdi ózimizge yńǵaılaımyz. Jerimizge topyraq alǵyzyp, kóshkinder de otyrǵyza bastaımyz, jańa úıde jańa ómirimizdi bastaımyz», deıdi ol qýanyshyn jasyra almaı.
Budan buryn jazǵanymyzdaı, «ZIKSTO» AQ kómek retinde úı jıhazdary men turmystyq tehnıkalar áperýge ýáde bergen. Myna úıge de tońazytqysh, gazplıta, kir jýatyn mashına jáne jıhaz syılapty. Eń qajetti turmystyq zattar. Endi balalar keń úıdiń buryshtaryn ózderine menshikteýge jantalasyp jatyr.
Árıne, keıbir úıler áli tolyq aıaqtalmaǵan. Mysaly, Anatolıı Zılge berilgen úıdiń ishki jumystary áli 2-3 kúndik jumysty talap etedi eken. Baqytqa bólengenderdiń biri – Kýmınovtar otbasy. Erli-zaıypty ekeýi ǵana turatyn bulardyń qýanyshynda da shek joq. Aıtýlaryna qaraǵanda, burynǵy turǵan úıleri 65 sharshy metr eken. Ári ol úı bálen jylǵy eski kórinedi. Endi 90 sharshy metrlik han saraıyndaı úıge túsip tur. «Úı bizge qatty unady, tynysy keń, jaryq. Endi tezirek úıdiń ishin qalypqa keltirip, jıhazdar men turmystyq tehnıkalarymyzdy ornalastyrýǵa kirisemiz. Bizge tez arada úı salyp bergen jandardyń bárine alǵysymyz sheksiz», deıdi úı ıesiniń zaıyby Svetlana Kýmınova.
Rýstam Qojahmetov esimdi jas jigit te tamasha úılerdiń birine kirdi. «О́z basym mynadaı úı alarmyn dep oılaǵan joqpyn. Jaınaǵan, jarqyraǵan úı meniń eki balam men jarymdy da qýantyp jatyr. Balalarym bir bólmeden ekinshisine júgirip, oınap ketti. Prezıdentke, onyń tapsyrmasyn oryndaǵan Úkimet pen jergilikti bılikke shyn júrekten alǵysymdy aıtamyn», dedi ol. Botagóz Aıtmaǵanbetova Oıqalada 20 jyl turǵandaryn aıtty. «Úıimizdiń ishine sý kirip ketkende, bul dúnıedegi baqytsyz jan jalǵyz biz sekildi kórdik. Biraq el tastamady, Prezıdenttiń ózi kelip, úı beremiz, ýaıymdamańyzdar, dalada qaldyrmaımyz degen edi, endi, mine, sol kisiniń sóziniń shyndyǵyna kózimiz jetip otyr. Alǵysym sheksiz. Basqa da qoldaý bildirgenderge, demeýshilerge shyn júrekten alǵys aıtamyn», dedi ol tolqyp turyp.
Osy úıler 40 kúnde daıyn bolǵan eken. Alǵashqysymen qosqanda 40 kúnde barlyǵy 100 úı paıdalanýǵa berildi. Eń bastysy úı eń qajetti dúnıelerimen tolyqqan.
Soltústik Qazaqstan oblysy
