Jaz bastalyp, turǵyndar arasynda sýǵa, ásirese aýyzsýǵa qatysty másele qaıta kóterilgen tusta Saıyn Shapaǵatov aýlynda Mańǵystaý oblysynyń ákimi Nurdáýlet Qılybaıdyń qatysýymen sý tushytý qondyrǵysy iske qosyldy. On myńǵa jýyq turǵyny bar Saıyn aýlynda jańa sý tushytý qondyrǵysynyń iske qosylýy bul baǵyttaǵy kóńil kónshitip, qıyndyqty jeńildeter jańalyqtyń biri boldy.
Jańa qondyrǵynyń kómegimen zaýyt qýaty eki ese artty. Kásiporyn táýligine 4 500 tekshe metr sý tushytady. Bul on myńǵa jýyq turǵyny bar Saıyn Shapaǵatov pen kórshi 15 myń adam turatyn Aqshuqyr aýylyn aýyzsýmen qamtamasyz etýge tolyq múmkindik beredi. Sý tushytý zaýyty shıkizat retinde jerasty sýyn paıdalanyp, aýyl halqyna sanıtarlyq talapqa saı aýyzsý usynady. Aldaǵy ýaqytta óndiris oshaǵynyń táýliktik qýaty 6 500 tekshe metrge deıin artpaq. Jańa zaýyttyń jalpy quny – 1 000 000 000 (1 mlrd) teńge, jobany «Aleka» JShS «Halyq» qaıyrymdylyq qorynyń qoldaýymen iske asyryp otyr.
Nurdáýlet Qılybaı ıgi bastamaǵa muryndyq bolǵan kásipkerlerge mańǵystaýlyqtar atynan alǵysyn jetkizdi.
«Memleket basshysynyń óńirdegi sý tapshylyǵyn joıyp, halyqty taza sýmen qamtý jaıynda arnaıy tapsyrmasy bar. Jerlesterimizge tirshilik nárin jetkizý isi kún tártibinen túspeıdi. Qazir oblysta aýyzsý tapshylyǵyn joıý úshin birqatar joba qarqyndy júrip jatyr. Nátıjesin kóretin sát te alys emes. Tamyz aıyna deıin «MAEK» JShS aýmaǵynda táýligine 6 myń tekshe metr sý tushytatyn qondyrǵy iske qosylsa, «SK-A-Stroı» JShS sý tushytý zaýyty qýatyn 5 myńnan 9 myń tekshe metrge deıin arttyrady. Sondaı-aq tamyzdan bastap Aqtaý qalasyna táýligine qosymsha 6 myń tekshe metr aýyzsý, Baıandy aýylyndaǵy sý tushytý qondyrǵysy arqyly táýligine qosymsha 3 myń tekshe metr aýyzsý Munaılyǵa beriledi», dedi aımaq basshysy.
Mańǵystaý oblysy
