Pikirtalas alańynda áıelderdiń dıplomatııaǵa qosqan eleýli úlesin kórsetý, ózara tájirıbe men ıdeıalar almasý, sondaı-aq osy saladaǵy genderlik teńdikti odan ári ilgeriletý strategııalaryn talqylandy. Is-sharaǵa BUU-nyń elimizdegi turaqty úılestirýshisi Mıkaela Frıberg-Storı, Ulybrıtanııanyń Qazaqstandaǵy elshisi Ketı Lıch, BUU-nyń Áıelderge qatysty dıskrımınasııany joıý jónindegi komıtetiniń (CEDAW) múshesi Mádına Jarbosynova, Ońtústik Afrıka Respýblıkasynyń Qazaqstandaǵy elshisi Keıtýmetsı Seıpelo Tandeka Metıýz, QR SIM Kópjaqty yntymaqtastyq departamentiniń dırektory Dıdar Temenov jáne basqa da elimizdegi dıplomatııalyq korpýstyń ókilderi, stýdentter men akademııalyq orta ókilderi qatysty. Olar dıplomatııa salasyndaǵy áıelderdiń eleýli jetistikteri jaıly sóz qozǵap, ózderiniń kásibı tájirıbelerimen bólisti jáne genderlik teńdikti nyǵaıtýdyń naqty strategııalaryn usyndy.
«Uzaq jyldar boıy áıel elshilerdiń sany aıtarlyqtaı tómen bolǵan edi. 1968 jyly olardyń úlesi 20 paıyzdy ǵana quraǵan. Búgingi tańda iri dıplomatııalyq qyzmetterde áıelderdiń úlesi 50-70% aralyǵynda. Qazaqstan osy baǵytty ustanyp keledi, óıtkeni BUU-ǵa ókil retinde eń kóp áıel dıplomatty taǵaıyndaǵan el – Qazaqstan. Osy oraıda men Qazaqstandy quttyqtaı otyryp, jergilikti deńgeıde de genderlik teńdikke qol jetkizýlerińizge, ıaǵnı genderlik araqatynastyń 50/50 bolýyna tilektespin», dep atap ótti BUU-nyń Qazaqstandaǵy turaqty úılestirýshisi Mıkaela Frıberg-Storı.
«Sizde «Mundaı eleýli kún nelikten ýnıversıtette atap ótilip jatyr?» degen suraq týyndaýy múmkin. Buǵan bir sebep – ýnıversıtetterde «Halyqaralyq qatynastar» mamandyǵyna erekshe kóńil bólinedi. Bıyl Maqsut Narikbayev University-de osy oqý baǵdarlamasy boıynsha alǵashqy túlekter legi dıplom almaq. Búgin stýdentterge ataýly kúnniń mańyzyn tereńirek túsinýge múmkindik týyp otyr», dep málimdedi Maqsut Narikbayev University basqarma tóraǵasynyń orynbasary Aınur Karbozova.
Qazaqstandyq qoǵamdyq damý ınstıtýtynyń basqarma tóraǵasy Nurbek Matjanı qazaq áıel dıplomattarynyń júrip ótken joly men otandyq dıplomatııanyń negizin salýdaǵy eńbekterine toqtaldy. Oǵan qosa, elimizde qyzmet etip júrgen sheteldik áıel dıplomattardyń da róline basa nazar aýdaryp, olardyń da dıplomatııa salasyndaǵy genderlik teńdiktiń nyǵaıýyna ózindik úles qosyp jatqanyn atap ótti.
Aıta ketsek, BUU Bas Assambleıasynyń 76-sessııasynda 24 maýsym Dıplomatııadaǵy halyqaralyq áıelder kúni retinde bekitilgen. A/RES/76/269 Rezolıýsııasy barlyq múshe memleketterdi, BUU uıymdaryn, úkimettik emes toptardy, akademııalyq mekemelerdi jáne áıel dıplomattar qaýymdastyǵyn bul kúndi buqarany aqparattandyrý jáne habardar etý arqyly atap ótýge shaqyrady.
