Jaqynda turmystyq zorlyq-zombylyqqa tosqaýyl bolatyn arnaıy zań kúshine endi. Bul – óte qajetti qujat. Bul másele boıynsha meniń kózqarasym – barshańyzǵa aıqyn. Elimizdegi árbir shańyraq qazaq otbasynyń úlgisine aınalýy kerek. Árıne, qabyldanǵan zań barlyq qaterdi birden joıyp jibermeıdi. Bul – uzaq ári kúrdeli úderis. Zań jazalaý úshin emes, eń aldymen, quqyqtyq mádenıetti qalyptastyrý úshin mańyzdy. Oǵan búkil qoǵam bolyp atsalysý qajet. Osy jolda aqparat ókilderiniń róli erekshe, - dedi Memleket basshysy.
Prezıdent sondaı-aq qoǵamnyń qasiretine aınalǵan lýdomanııa týraly da sóz qozǵady.
Eń qaýipti áleýmettik keseldiń biri – lýdomanııa. Qumar oıynǵa táýeldilik kóptegen azamatty orǵa jyǵyp, qaryzǵa belshesinen batyrady, otbasynyń shyrqyn buzady, qylmysqa, sýısıdke ıtermeleıdi. Internet damyǵan saıyn lýdomanııa problemasy ýshyǵa tústi jáne naǵyz áleýmettik indetke aınala bastady. Bul ultymyzdyń bolashaǵyna qater tóndiredi. Sondyqtan Memleket basshysy retinde men osy qaýipti qubylyspen kúresý úshin birqatar pármendi sharalar qabyldadym, - dedi Q.Toqaev.
Memleket basshysy byltyr kúzde osy másele boıynsha Qaýipsizdik Keńesiniń arnaıy otyrysy ótkenin atap ótti.
Jýyrda meniń tapsyrmammen Úkimet Zańsyz oıyn bıznesi men lýdomanııaǵa qarsy is-qımyl jónindegi keshendi jospardy bekitti. Sonymen qatar tıisti zań jobasyn tez arada qabyldaý jóninde buǵan deıin birneshe ret aıtqan edim. Al búgin Senat lýdomanııaǵa qarsy zań jobasyn qaraıdy. Eger maquldansa, kóp uzatpaı men oǵan qol qoıamyn, dedi Qasym-Jomart Kemeluly.
Prezıdent atalǵan Zańnyń kúshine enýi azamattarymyzdy, eń aldymen, óskeleń urpaqty osy zııandy áleýmettik dertten saqtaýǵa múmkindik beretinine senimdi ekenin aıtty. Jáne oraıly sátti paıdalana otyryp, máselege beı-jaı qaramaı, zań jobasyn jedel ári sapaly ázirlegeni úshin Májilis pen Senat depýtattaryna alǵys aıtty.
