Baızaq aýdanyna qarasty Myrzataı aýyldyq okrýgindegi qańqasy ǵana qalǵan fabrıkany satyp alǵan kezde Farıda Júnisovaǵa «toz-tozy shyqqan fabrıkany qandaı maqsatqa paıdalanbaqshy?» dep tańyrqaı qaraǵandar az bolǵan joq. Alaıda táýekelge bel baılaǵan kásipkerdiń óz jospary bar bolatyn.
Isker azamat maqsatqa jetý jolynda múmkin bolǵan barlyq qadamǵa bardy. Qıraǵan kásiporyndy qaıta qalpyna keltirip, fabrıkanyń jumysyn júıeleý jolynda bar kúshin sarqa jumsady. Shúmektep tókken ter tekke ketken joq. Bastysy da sol emes pe? Bızneske bet burǵan Farıda «Agrarlyq nesıe korporasııasynan» jeńildetilgen nesıe alyp, jumysty jandandyrýǵa bilek sybana kiristi.
«Áýlıe-Ata Fenıks» 2016 jyly qaıta eńse tiktedi. Kásiporyn jumysyn shıratýdy maqsat tutqan basshy jolaı kezikken kedergilerge synǵan joq. Qaıta barlyq qıyndyqty eńserý arqyly erik-jigeriniń myqty ekenin baıqatty. Kásiporyn basshysy fabrıkany zamanaýı tehnıkamen jabdyqtaýǵa aıryqsha nazar aýdardy.
«Biz «Agroeksport» baǵdarlamasynyń sharapatyn bir kisideı kórdik. 2018 jyly sol baǵdarlama arqyly 658 mln teńge nesıe rásimdegen bolatynbyz. Nátıjesinde, Nıderlandydan qus ósirýge qajet degen barlyq zamanaýı qural-jabdyq pen aýyl sharýashylyǵy tehnıkasyn ákeldik. Sóıtip, fabrıkanyń jumysyn jandandyrdyq. Atqarylǵan jumystyń arqasynda óndiris qýaty ulǵaıdy. Áýeli jylyna 5 myń tonna shamasynda qus etin óndirgen bolsaq, tehnıkany jańartqannan keıin kórsetkishti 7 myń tonnaǵa deıin jetkizdik. Osylaısha, jańa belesterdi baǵyndyrýǵa den qoıa bastadyq», deıdi «Áýlıe-Ata Fenıks» JShS dırektorynyń kómekshisi Ilııas Dúısen.
Ol keltirgen derekke júginsek, kásiporynnyń aýmaǵy 536 gektar jerdi quraıdy. 18 qus qorasynda eńbek etetin jumysshylardyń kúshimen qyryqqa jýyq ónim shyǵarylyp jatyr. Fabrıka qyzmetkerleri balapandarǵa bıdaı men júgeri berip baǵyp otyr. Salmaǵyn 2 kılodan asyrýǵa bolmaıdy. О́ıtkeni halyqaralyq standartqa baǵyný kerek. Al kórshiles Qyrǵyz Respýblıkasy men Reseıge eksportqa shyǵarylatyn ónim jalpy ónimniń bes paıyzyn quraıdy eken.
Fabrıkanyń ónim óndirýdegi áleýeti jyl ótken saıyn arta tústi. Munyń barlyǵy ár jylǵa arnalǵan naqty strategııalyq jospardyń der kezinde iske asýynyń arqasynda múmkin bolǵany talas týdyrmaıdy. Máselen, 2017 jyly 4 200 tonna taýyq etinen túrli ónim shyǵarylsa, bul kórsetkish 2022 jyly 7 040 tonnaǵa jetti. Sondaı-aq 300 tonnaǵa jýyq etsúıek uny shyǵaryldy.
«2017 jyly eki elge jóneltilgen ónim bar bolǵany 52 tonna bolsa, 2018 jyly 172 tonnaǵa jetti. Bul kórsetkish 2023 jyly 463 tonnaǵa artqanyn aıta ketken lázim. Áıtse de fabrıka basshylyǵy birinshi kezekte jergilikti naryqty qamtýǵa den qoıyp otyr. Memlekettik deńgeıdegi qoldaýdyń arqasynda kásiporyn jumysy jyl ótken saıyn jandanyp keledi. Qazir qus fabrıkasynda 247 azamat eńbek etip júr. Olardyń deni jergilikti turǵyndar. Kásiporyn qyzmetshileri jalaqysyn der kezinde alady. On úshinshi jalaqy da qarastyrylǵan. Ortasha eńbekaqy – shamamen 149 myń teńge», deıdi fabrıka dırektorynyń kemekshisi I.Dúısen.
Qus fabrıkasy 2023 jyly qus ósirý qorasynyń sanyn 24-ke jetkizý úshin «Agrarlyq nesıe korporasııasynan» 1 mlrd teńgeden astam nesıe alýǵa ótinim bildirdi. Korporasııa bul ótinimdi maquldaǵan. «Áýlıe-Ata Fenıks» basshylary osy jyly qosymsha 6 qus ósirý qorasy qurylysyn bastaýdy josparlap otyr.
Áleýetti kásiporynnan jergilikti qazynaǵa da kóp-kórim salyq túsedi. Máselen, «Áýlıe-Ata Fenıks» qus fabrıkasy 2019 jyly jergilikti bıýdjetke 280,2 mln salyq tólese, kórsetkish 2023 jyly 481,73 mln teńgege deıin jetken. Endi qosymsha taǵy 6 qus ósirý qorasy salynyp, óndiris qýaty 12 myń tonnaǵa artsa, qazynaǵa túsetin qarajat ta kóbeımek.
Jambyl oblysy,
Baızaq aýdany
