foto: shutterstock
Atap aıtqanda, orman jáne tabıǵatty qorǵaý uıymdarynyń qyzmetkerlerine eńbekaqy tóleý júıesin, sharttary men mólsherin jaqsartý maqsatynda «Azamattyq qyzmetshilerge, memlekettik bıýdjet qarajaty esebinen ustalatyn uıymdardyń qyzmetkerlerine, qazynalyq kásiporyndardyń qyzmetkerlerine eńbekaqy tóleý júıesi týraly» Úkimet qaýlysyna ózgerister engizildi.
Qujatqa sáıkes orman órtin sóndirý stansalarynyń, orman mekemeleriniń, tabıǵat qorǵaý jáne orman ornalastyrý uıymdarynyń qyzmetkerleri laýazymdyq jalaqylaryna 100%-ǵa deıin ústemeaqy alady. Olardyń ishinde orman órtin sóndirýshiler, órt sóndirý mashınalarynyń júrgizýshileri, traktorshy-mashınıster, radıooperatorlar, órt sóndirý mashınalaryn, jabdyqtary men apparatýralaryn jóndeıtin slesarlar, órt-baqylaý munarasynyń baqylaýshylary bar. Sondaı-aq 113 avıasııalyq kúzet órt sóndirýshi-desantshysynyń jalaqysy kóteriledi.
Qaýlyny iske asyrýǵa 2024-2027 jyldarǵa arnalǵan respýblıkalyq bıýdjetten 8 480,1 mln teńge kóleminde qarjylyq shyǵyndar kózdelgen. Barlyǵy 3,3 myńǵa jýyq qyzmetker qosymsha aqymen qamtylatyn bolady.
Jergilikti atqarýshy organdardyń orman sharýashylyǵy mekemeleriniń orman órt sóndirý stansalarynyń 1 619 qyzmetkerine qosymsha aqy tóleýdi qarjylandyrý jergilikti bıýdjet qarajaty esebinen josparlanady.
Buǵan deıin Parlament Senatynyń depýtaty Olga Býlavkınanyń suraýyna jaýap bere otyryp, Úkimet basshysy orman jáne tabıǵatty qorǵaý mekemeleriniń barlyq qyzmetkerleriniń jalaqysyn kóterý máselesi óziniń turaqty baqylaýynda ekenin jáne tıisti qaýlynyń jobasy daıyndalǵanyn aıtty. Depýtat «Semeı ormany» RMM Borodýlıha fılıalynyń qyzmetkerleri úshin qosymsha aqylar taqyrybyn kóterdi.
2023 jyldyń shildesinde Memleket basshysy Q.Toqaevtyń tapsyrmasyn iske asyrý aıasynda orman qurylymdary qyzmetkerleriniń ómirine jáne densaýlyǵyna qaýip tóndiretin jumysy úshin laýazymdyq jalaqylaryna 100% ústemeaqy belgilendi.
