Atalǵan oqıǵaǵa oraı Qazaqstan Prezıdenti Qasym-Jomart Toqaev quttyqtaý hat joldady. Memleket basshysy eki el arasyndaǵy qarym-qatynas turaqty kópjaqty strategııalyq áriptestiktiń asa joǵary deńgeıine shyǵarylǵanyn jetkizdi. Qasym-Jomart Toqaev mádenı jáne gýmanıtarlyq baılanystardy elderimiz ben halyqtarymyzdy jalǵaıtyn zamanaýı altyn kópir dep atady. Prezıdenttiń sózinshe, ShYU sammıti qarsańynda eki el mádenı ortalyqtarynyń ashylýy men bilim berý, ǵylym jáne týrızm salalarynda, basqa da birqatar birlesken jobalardyń iske qosylýy úlken mańyzǵa ıe. Qazaqstan basshysy ekijaqty dostyq ári qaraı da nyǵaıa beretinine senim bildirdi.
Jańa maýsymnyń ashylý rásiminde QKP OK Nasıhat bóliminiń meńgerýshisi, Qytaı Medıakorporasııasynyń basshysy Shen Haısıýn sóz sóıledi. Ol Qytaı men Qazaqstan ortaq taýlar men ózender baılanystyrǵan jaqsy kórshiler, jaqsy dostar jáne jaqsy áriptester ekenin aıtty. Sondaı-aq ol QHR Tóraǵasy Sı Szınpın birlesken Jibek jolynyń Ekonomıkalyq beldeýin qurý bastamasyn alǵash dál Qazaqstanda ilgeriletkenin eske saldy. Jáne de 11 jyl bederinde eki eldiń «Bir beldeý – bir jol» qurylysyn birlesip salýda aıtarlyqtaı tabysqa qol jetkize alǵanyn aıtty. Shen Haısıýn Qytaı Medıakorporasııasy álemdegi jetekshi BAQ-tyń biri bola otyryp, qashanda Qytaı men Qazaqstan halyqtaryn jaqyndastyrýǵa yqpal etýge umtylǵanyn málimdedi. Qytaı Medıakorporasııasy basshysynyń sózine qaraǵanda, «Sı Szınpınniń súıikti qanatty sózderiniń» jańa maýsymy Qytaı kóshbasshysynyń qytaı órkenıetiniń qaıtalanbas rýhyn, jańa dáýirdiń mańyzy men jahandaný qundylyqtaryn tereń túsinetinin aıǵaqtaıdy. Shen Haısıýn qytaı klassıkasynyń danalyǵy basqa elder kórermenderine de qoljetimdi bolatynyna, al Qazaqstan turǵyndarynyń Qytaıdyń ótkeni, búgini men keleshegi týraly kóbirek bilip qana qoımaı, Qytaıdyń búkil adamzattyń beıbit damýyna umtylysynyń alǵysharttaryn túsinetinine senim bildirdi.
Qazaqstannyń saıası toptary men BAQ ókilderi baǵdarlamalar sıkliniń kórsetilimderi bastalýyn taǵatsyzdana kútip otyrǵandaryn málimdedi. Sondaı-aq olar «Sı Szınpınniń súıikti qanatty sózderiniń» jańa maýsymy Qazaqstan kórermenderine Qytaıdy jaqsyraq tanyp-bilip, qytaı mádenıetiniń barlyq tamasha qyrlaryn sezinýge múmkindik beretinin atap ótti. Buǵan qosa olar eki el buqaralyq aqparat quraldary arasyndaǵy yntymaqtastyq tek keńeıe túsetinine, munyń qytaı-qazaq dostyǵy negizderin nyǵaıtýǵa septigin tıgizetinine senim bildirdi.
«Sı Szınpınniń súıikti qanatty sózderiniń» úshinshi maýsymy qazaq tilinde «Atameken Bıznes» telearnasynyń efıri men Qazaqstannyń basqa da medıaplatformalarynda kórsetiletin bolady. Onda QHR Tóraǵasy Sı Szınpın sóılegen sózderinde nemese óziniń maqalalarynda qoldanǵan qytaıdyń klassıkalyq týyndylarynan, kóne ańyzdarynan, tarıhı jáne fılosofııalyq traktattarynan dáıeksózder jınaqtalǵan. Olar Qytaı kóshbasshysynyń saıası danalyǵyn, tarıhı úrdister men dúnıetanym týraly túsinigin aıǵaqtaıdy.
