«Múgedek bolsam da esh kedergisiz daýys berdim»

PETROPAVL. 26 sáýir. Soltústik Qazaqstan oblysynda jasy kelgen keıbir saılaýshylar óz úılerinen daýys berýde. Sondaı jandardyń biri – 30 jyl kúsh kúsh qurylymynda eńbek etken ardager, 74 jastaǵy Amangeldi Elamanov. Ol búginde densaýlyǵy syr berse de esh kedergisiz daýys bergenin aıtty. Bul týraly egemen.kz tilshisi habarlady. «Sanaly ǵumyrymdy elimizdi, jerimizdi kórkeıtýge arnadym. Bizdiń kezimizde ár saıası naýqannyń jóni bólek bolatyn. Aldyn ala úlken meıram retinde daıyndalyp, ústimizge taza kıimderimizdi kıip, kóterińki kóńil-kúımen baratynbyz. Qazir zaman ózgerdi demeseń, aıyrmashylyǵy shamaly. Ásem áýen áýelep, saýda-sattyq qyzyp turady. Eń bastysy, adamdardyń nıeti túzý, pıǵyly durys. Elimiz tynysh, baqýatty damyp keledi», – deıdi aqsaqal. Saılaýdy uıymdastyrýshylarǵa alǵysyn jaýdyrǵan qart saılaýshy: «Qandaı saılaý bolsyn balalar men jasóspirimder kitaphanasynda ornalasqan №626 saılaý ýchaskesine otbasymyzben baryp, óz tańdaýymyzdy jasaýshy edik. Bıyl qatty syrqattanyp, júrip-turýǵa mursham bolmady. Qatty qapalanyp otyrǵanymda, myń bolǵyr jandar kelip, «ata, esh qam jemeńiz, saılaý jáshigin úıge ákelemiz» dedi. Sol sózdi estip tóbem kókke jetkendeı boldy. Men sııaqty múmkindigi shekteýli naýqastardyń esh kedergisiz daýys berýine jaǵdaı týdyrylǵanyna kóńilim bir kóterilip qaldy», – degen kúsh qurylymdarynyń ardageri otbasynda ózinen basqa taǵy 4 jannyń óz tańdaýyn jasaǵanyn aıtty. О́mir Esqalı. Derek: egemen.kz. Sýret: Amangeldi Bekmuratov.