Aqtóbe mańyndaǵy saıajaı turǵyndary tabıǵı apattyń saldarynan birneshe saǵattyń ishinde úı-kúısiz qaldy. Olar tek qujattaryn alyp úlgergen. Qazir zardap shekken turǵyndar Q.Jubanov atyndaǵy Aqtóbe óńirlik ýnıversıtetiniń jataqhanasyndaǵy evakýasııalyq pýnktte turyp jatyr.
– Sáýir aıynda úıimiz sýǵa ketkennen beri biz evakýasııa ortalyǵynda turyp jatyrmyz. Munda barlyq jaǵdaı jasalǵan. Úsh mezgil tamaq beriledi, kınoǵa, konsertterge bıletter taratylady. Partııa ókilderi tórt jasar qyzymdy balabaqshaǵa ornalastyrýǵa kómektesti. Biz jóndeý jumystaryna kirisip kettik, jaqyn arada úıimizge oralatyn kún de alys emes, – deıdi Aqtóbe turǵyny Marjangúl Ernazarova.
Qazirgi ýaqytta evakýasııa pýnktinde 36 adamdy quraıtyn 9 otbasy turady. Aqtóbe qalasy boıynsha barlyǵy 7 ýaqytsha ornalastyrý pýnkti jumys isteıdi, onda qazir 695 adam bolsa, onyń 325-i bala.
– Baspanadan aıyrylý ár otbasy úshin úlken synaq ekenin túsinemiz. Bizdiń mindetimiz – zardap shekkenderdi ýaqytsha ornalastyrýmen qatar, olardy múmkindiginshe tezirek qalypty ómirge oralýyna kómektesý. Biz sý tasqynynan zardap shekkenderdiń árqaısysyna qoldaý men qajetti kómekti alýy úshin bar kúshimizdi salamyz. Birlesken kúsh-jigerimizben biz barlyq qıyndyqty eńseremiz, – dedi Májilis depýtaty Qazybek Álishev.
Sý tasqynynan zardap shekken Aqtóbe oblysynyń turǵyndaryna arnap 517 úı salynyp jatyr. Sonymen qatar memleket esebinen 383 páter satyp alyndy.
