Memleket basshysy Qasym-Jomart Toqaev bıyl Atyraýda ótken Ulttyq quryltaıdyń úshinshi otyrysynda halqymyzdyń qanynda janashyrlyq, qamqorlyq, baýyrmaldyq syndy asyl qasıetterdiń baryn aıryqsha atap ótti.
«Qazaqstan – bárimizdiń qasıetti qara shańyraǵymyz. Sondyqtan árbir azamat el taǵdyryna óz taǵdyryndaı qaraýǵa tıis. Bizdiń kúshimiz yntymaqta. Elimizdiń áleýmettik saıasaty osy qundylyqqa negizdelgen. Memleket te, qoǵam da kómekke shyn muqtaj adamdardy qoldaýǵa qashanda daıyn. Bizdiń eriktilerimizdiń eren eńbegi – janashyr bolýdyń shynaıy úlgisi. Olar kez kelgen sátte ózgelerge rııasyz kóńilmen kómektesýge umtylady. Bıznes ókilderi jáne basqa da azamattarymyz túrli qaıyrymdylyq sharalarǵa belsene atsalysady. Bul da – tileýles bolýdyń aıqyn kórinisi», dep Prezıdent irgeli qundylyqtardyń mańyzdylyǵyn taǵy bir márte eske saldy.
Osy sabaqtastyqtyń jibin úzbeı bastalǵan joba aıasynda kúntizbedegi mańyzdy kúnderge, halyqaralyq jáne túrli áleýmettik, mádenı taqyryptarǵa arnalǵan «Jaqsylyq aptalyǵy», jyl saıynǵy taqyryptyq is-sharalar ótkizý josparlanyp otyr. Bir aıta keterligi, taqyryptar ataýy jyl saıyn ózgerip otyrady. Bul áleýmettik jaýapkershiliktiń túrli salalaryna qyzyǵýshylyqty arttyra otyryp, ózekti máselelerdi qamtýǵa umtylady.
«Igi ister marafonynyń» alǵashqy aptasy ekologııaǵa arnalady. Jobaǵa qatysý úshin jasaǵan ıgi is týraly áleýmettik jelilerde aqparat jarııalap, Qazvolunteer.kz onlaın platformasynda tirkeýden ótýi qajet.
Marafon qorytyndysynda eń belsendi qatysýshylar Alǵyshattarmen jáne estelik syılyqtarmen marapattalady. Tolyq aqparat Qazvolunteer.kz saıtynda jáne áleýmettik jelidegi @kz_nvs jáne @qazvolunteer.kz paraqshalarynda jarııalanady.
