Májilis depýtattary, «Amanat» fraksııasynyń músheleri Erkebulan Mámbetov pen Dmıtrıı Koloda, sondaı-aq Senat depýtaty Ásem Rahmetova júrgizilip jatqan jumys barysymen tanysyp, turǵyndar suraqtaryna jaýap berý úshin aýylǵa keldi.
Bolshaıa Malyshka aýlynda 321 úıdiń 66-sy apatty jaǵdaıda dep tanyldy. Sý tasqynynan zardap shekken turǵyndardyń bir bóligi osy aýdandaǵy irgeles aýyldarda jáne Petropavlda jańa turǵyn úı alýǵa tıis. Al endi bir bóligi úı jóndeýge qajet materıaldyq kómek aldy. Pavel Vojjovtyń úıi bir aıǵa jýyq ýaqyt 1,5 metr sý astynda qaldy. Qazir kúrdeli jóndeý jumysy júrgizilip jatyr.
– Úıdi qalpyna keltirýge 5 mln 700 myń teńge bólindi. Materıaldar satyp alynyp, jóndeý jumys bastalyp ketti. Ony merziminde aıaqtaý asa mańyzdy. Qazirdiń ózinde bóreneler aýystyrylyp, eden tóseldi. Jóndeý jumysy shilde aıynyń sońyna deıin aıaqtalady dep josparlanyp otyr. Qurylysshylardyń atqaryp jatqan jumysyna rızamyn, – dedi Pavel Vojjov.
Alaıda turǵyndardyń bári birdeı sarapshy-baǵalaýshylardyń pikirimen kelise bermeıdi. Májilis depýtattary bul Soltústik Qazaqstan oblysy azamattaryn tolǵandyrǵan eń ózekti máseleniń biri ekenin atap ótti. Sý tasqynynan zardap shekken turǵyndar smetany qaıta qaraýdy, qosalqy qurylys nysandaryn zańdastyrýǵa qolushyn sozýdy, sondaı-aq menshik quqyǵynyń bolmaýyna baılanysty máselelerdi sheshýge kómek kórsetýdi surap otyr. Depýtattar ár jaǵdaıǵa tereń úńilip, turǵyndarǵa ótemaqy alý tártibin túsindirip keledi.
Bolshaıa Malyshka aýylynda 900-ge jýyq adam turady. Búginde aýylda jańa feldsherlik-akýsherlik pýnkt salynyp jatyr. Nysandy kúzde paıdalanýǵa berý josparlanǵan bolatyn. Alaıda qurylysshylar sý tasqynyna baılanysty jumysty merziminde aıaqtap úlgere almaı jatyr. Bul máseleni depýtattar baqylaýǵa aldy. Qyzyljar aýdanynda sý tasqynynan barlyǵy 1 546 úı zardap shekti. Búginde aýdandaǵy 60-qa jýyq turǵyn jańa úılerge qonystandy.
