Túsiniktirek bolýy úshin aıtyp óteıik, «Forbes» tizimindegi eń dáýletti adamdardyń reıtınginen túspeıtin qos bıznesmen ıelikterindegi «OAEK» AQ arqyly «Pavlodarenergo» AQ kompanııasynyń aksııalaryn ıemdenip otyr. Al «Pavlodarenergo» kompanııasy osy ýaqytqa deıin Ekibastuz jylý-energııa ortalyǵyn basqaryp keldi. Bıylǵy maýsym aıynyń ortasynda Ekibastuz qalasynyń ákimdigi JEO-ny «Samuryq-Energoǵa» senimgerlik basqarýǵa berdi. Aksıonerlik qoǵam stansany «Energy Solution Center» JShS enshiles kompanııasy arqyly basqarady. «Samuryq-Energo» AQ basqarma tóraǵasy Qaırat Maqsutov Ekibastuz JEO-da jınalys ótkizip, «Energy Solution Center» JShS bas dırektory Aıdarbek Qystaýbaevty, sondaı-aq onyń óndiris, qarjy jáne qamtamasyz etý jónindegi orynbasarlaryn tanystyrdy. Sonymen qatar ol bıyl Ekibastuz JEO-da energetıkalyq qazandyqtar men qosalqy jabdyqtardyń bir bóligin jóndeý josparlanyp otyrǵanyn atap ótti.
Al kásiporyndy buǵan deıin basqaryp kelgen bıznestik toptyń 2023 jylǵa shoǵyrlandyrylǵan esebinde aıtylǵandaı, Aleksandr Klebanov pen Sergeı Kan Ekibastuz qalasynyń ákimdigine Ekibastuz JEO-nyń jalpy quny 3,7 mlrd teńge turatyn múlikterin bergen. Bul degenimiz – óndiristik, ákimshilik ǵımarattar men qurylystar, negizgi jáne qosalqy qazandyq jabdyqtary. Al «Forbes.kz» portaly habarlaǵandaı, múlikti ótkizý 2024 jyldyń mamyr aıynda júrgizilgen, biraq esep jarııalanǵan ýaqytta (2024 jyldyń 26 maýsymy kúni) «Pavlodarenergo» AQ men onyń enshiles kompanııasy Ekibastuzda jylý qýatyn óndirýmen jáne satýmen áli de bolsyn shuǵyldanyp otyrǵany aıtylady.
«Bul – múlikti ákimdik balansyna berýdiń ekinshi «transhy». Buǵan deıin 2023 jyldyń aqpan aıynda kompanııa quny 1,8 mlrd teńge turatyn jylý jelilerin, negizgi jáne qosalqy qazandyq jabdyqtaryn ákimdikke ótkizgen. Sol ýaqytta Memleket basshysynyń tapsyrmasy boıynsha bıznestik top pen Ekibastuz qalasynyń bıligi «Ekibastuz JEO-nyń jumysyn qalpyna keltirý boıynsha is-áreketter josparyn» ázirlegen edi», delingen habarlamada.
«Pavlodarenergo» AQ-nyń baspasóz qyzmeti qazir Ekibastuz JEO tolyǵymen «Samuryq-Energoǵa» senimgerlik basqarýǵa berilgenin naqtylady, ıaǵnı «Energy Solution Center» JShS kásiporyndy tolyǵymen baqylaýǵa alǵan.
«Ekibastuzdaǵy jylý-energııa ortalyǵyna qatysty aqparat berý bizdiń quzyrymyzǵa jatpaıdy. Sebebi ol endi 100 paıyz «Samuryq-Energonyń» basqarýynda. Qaladaǵy jylý jelileri tolyǵymen Ekibastuz qalasy ákimdiginiń balansynda ekeni de belgili. «Pavlodarenergo» kompanııasyna atalǵan jeliler senimgerlik basqarýǵa berildi. Biz qalany jylýmen qamtý úderisine osy jeliler arqyly ǵana qatysa alamyz», dep málimdedi kompanııa.
Aleksandr Klebanov buǵan deıin Ekibastuz JEO aktıvterin 2008 jyly jeke kompanııadan satyp alǵanyn aıtqan edi.
«Biz jylý jelileriniń tozý máselesin buǵan deıin de birneshe ret kóterdik. Alaıda jeke kompanııa retinde tutynýshylar úshin belgilengen tarıftik baǵany kótere almaımyz. Sol sebepti, kásiporynnyń shyǵyny áýel bastan kóp. Kásiporynnyń kirisi tipti stansany qamtamasyz etýge de jetpedi» deı kele, stansany jergilikti bılikke 1 teńgege satýǵa daıyn ekenin málimdegen.
Qazir «Pavlodarenergo» AQ-nyń menshik ıesi «OAEK» AQ-nyń negizgi aksıonerleri – Sergeı Kan men Aleksandr Klebanov. Olardyń árbiriniń enshisindegi aksııa úlesi – 47,1%. Buǵan qosa ekeýiniń «Ortalyq Azııa otyn-energetıkalyq kompanııasynda» 50%-dan úlesi bar. Aleksandr Klebanov elimizdegi eń baı adamdardyń tiziminde 12, eń yqpaldy bıznesmender arasynda 50-orynda tur. «Forbes Kazakhstan» onyń dáýletin shamamen 815 mln dollar dep baǵalaıdy. Al Sergeı Kan alǵashqy atalǵan tizimde 31-orynda tur. Onyń dáýleti shamamen – 292 mln dollar. Kásipker joǵaryda atalǵandarmen qosa, «Circle Maritime Invest» AQ keme qatynasy kompanııasynyń 50% aksııasyn ıelenip otyr.
Aıtpaqshy, Ekibastuz qalasynyń ákimdigi 1 shilde kúni Ekibastuz qalasynda obektilik aýqymdaǵy tehnogendik sıpattaǵy tótenshe jaǵdaı rejimin jarııalady. Negizgi sebep – Ekibastuz JEO-daǵy qazandyq agregattaryn jóndeýge qosymsha qarajat bólý.
1956 jyly paıdalanýǵa berilgen stansada belgilengen elektr qýaty – 12 MVt, jylý qýaty – 750 Gkal/saǵ. Jylý elektr ortalyǵy kómirli shahardy jylýmen tolyq qamtamasyz etedi. 2022 jyldyń sońynda Ekibastuz JEO-da apat bolyp, qaladaǵy úılerdiń kóp bóligi qaqaǵan aıazda jylýsyz qalǵany málim. Bıyl Úkimet Pavlodar, Ekibastuz, Aqsý qalalarynda jylý jelilerin salýǵa 9 mlrd teńge bóldi. Onyń 3,4 mlrd teńgesi Ekibastuzǵa baǵyttalady.
Pavlodar oblysy,
Ekibastuz qalasy
