Parlamentaralyq áriptestik

BRIKS-tiń H Parlamenttik forý­my­nyń ekinshi kúni keńeıtilgen for­mattaǵy Plenarlyq otyrystyń ses­sııasymen ashyldy. Onda qatysý­shy­lar kópjaqty saýda júıesiniń bólshektenýine qarsy is-qımyl máse­lelerin jáne jahandyq daǵdarys­tardyń saldarynan týyndaıtyn syn-qa­terlerdi eńserý kezindegi Par­lament­terdiń rólin talqylady. Sondaı-aq mádenı-gýmanıtarlyq saladaǵy parlamentaralyq yntymaq­tastyqty nyǵaıtý barysyna nazar aýdardy.

Sonymen qatar Sankt-Peterbýrgte TMD Parlamentaralyq Assambleıasy Keńesiniń otyrysy ótti. Is-sharada depýtattar Ázerbaıjan men Reseıde ótken kezekten tys prezıdent saılaýyna jáne Belarýstaǵy Parlament saılaýyna Assambleıadan qatysqan baıqaýshylardyń jumys nátıjelerin qarady. Odan bólek, О́zbekstan men Ázerbaıjanda ótetin Parlament saılaýyna daıyndyq barysy pysyq­taldy.

Keńes otyrysynda TMD-da mo­deldik zań shyǵarýdyń 2023-2025 jyl­darǵa arnalǵan perspektıvalyq jospary da qaraldy. Palata spıkeri Máýlen Áshimbaevtyń tapsyrmasymen Qazaqstan Parlamentiniń Senaty atalǵan josparǵa otbasylyq-turmystyq zorlyq-zombylyqqa qarsy is-qımyl týraly modeldik zań ázirleýdi qosý jóninde usynys jasady. Qazaqstandyq senatorlardyń bul bastamasyna TMD PAA-daǵy áriptesteri qoldaý bildirip, bizdiń memlekettiń zańnamalyq jumystaǵy oń tájirıbesine nazar aýdardy.

«Otbasylyq-turmystyq zorlyq-zombylyqqa qarsy is-qımyldy zańna­malyq turǵydan retteý jáne onyń aldyn alý baǵytynda Qazaqstannyń aı­tar­lyqtaı tájirıbesi bar. Mem­le­ket basshysy Qasym-Jomart Kemeluly Toqaevtyń bastamasymen bıyl sáýir aıynda áıelder men balalardyń quqyqtaryn qorǵaýdy arttyrýǵa arnalǵan zań qabyldandy. Sondyqtan Qazaqstan Parlamentiniń Senaty TMD elderi úshin modeldik zań ázirleý týraly bastama kóterdi. Osy jyldyń sońyna deıin Senat tıisti zańnamalyq aktiniń jobasyn Parlamentaralyq Assambleıanyń qaraýyna engizedi. Atalǵan modeldik zańdy TMD elde­riniń Parlament depýtattary ózderiniń zań shyǵarý qyzmetinde paıdalana alady», dedi Senat spıkeri.

Sondaı-aq Máýlen Áshimbaev sapar aıasyda birqatar ekijaqty kezdesýler ótkizdi.

Búkilqytaılyq halyq ókilderiniń jınalysy Turaqty komıtetiniń tóraǵasy Chjao Leszımen suhbat kezinde Palata tóraǵasy Qazaqstan-Qytaı qarym-qatynasyn joǵary baǵalap, eki eldiń baılanysyna QHR Tóraǵasy Sı Szınpınniń jaqynda Qazaqstanǵa jasaǵan memlekettik sapary jáne onyń Astanadaǵy ShYU sammıtine qatysýy tyń serpin bergenin aıtty. Máýlen Áshimbaev atap ótkendeı, Memleket basshylary qol qoıǵan birlesken málimdeme jan-jaqty strategııalyq seriktestikti odan ári nyǵaıta tústi.

Sonymen birge Senat spıkeri Reseı Federaldyq Jınalysy Federasııa Keńesiniń tóraǵasy Valentına Mat­vıenkomen kezdesti. Onda Máýlen Áshimbaev BRIKS-tiń H Parlamenttik forýmy halyqaralyq deńgeıde mańyz­dy bastamalardy ilgeriletýge yqpal etetinine senim bildirdi. Taraptar eki memlekettiń qarym-qatynasy barlyq baǵyt boıynsha serpindi damyp kele jatqanyn da tilge tıek etti. Atap aıtqanda, ónerkásip, ǵylym, aýyl sharýashylyǵy, kólik, týrızm, bilim berý jáne óńiraralyq ózara is-qımyl salasyndaǵy birlesken jobalardy ári qaraı arttyrýǵa múddeli ekenderin tanytty.

Úndistan Halyq palatasynyń spıkeri Om Bırlamen kezdesý barysynda memleketter arasyndaǵy berik ekonomıkalyq jáne mádenı baılanystar, sondaı-aq parlamentara­lyq yntymaqtastyqty jandandyrý máseleleri sóz boldy. Odan bólek, suhbattasýshylar Álemdik jáne dástúrli dinder kóshbasshylary Sezi aıasynda rýhanı dıplomatııany damytý barysyna toqtaldy.

Máýlen Áshimbaev Qyrǵyz Res­pýb­lıkasy Jogorký Keneshiniń tóraǵasy Nurlanbek Shakıevpen de kezdesti. Dıalog kezinde baýyrlas halyqtar arasyn­daǵy qarym-qatynastyń jan-jaqty sıpatyna basa mán berildi. Senat Tóraǵasy mundaı tyǵyz yntymaqtastyq mem­leket basshylarynyń ózara senim men dostyqqa negizdelgen baı­lanysynyń nátıjesi ekenin, bul ekijaqty baılanys­tarǵa mańyzdy serpin bergenin aıtty. Kezdesý kezinde taraptar TúrkPA aıasyndaǵy yntymaqtastyq pen ortaq mindetterge jáne Assambleıanyń О́zbekstanda ótetin aldaǵy otyrysyna da nazar aýdardy.