Onyń aıasynda iri kompanııalardyń ókilderi ýnıversıtet stýdentterine 25 mln teńgeden astam qarjyǵa ataýly granttar men stıpendııalar taǵaıyndady. Saltanatty is-sharada elimizdegi 4 joǵary oqý oryndarynyń úzdik stýdentteri de elordada erekshe úlgidegi dıplomdaryn qolǵa aldy.
Astana medısına ýnıversıteti - Qazaqstanda dárigerlerdi daıyndaý boıynsha kóshbasshy. Jyl saıyn oqý ordasynyń 1000-nan astam jas mamany elimizdiń medısınalyq mekemelerine jumysqa ornalasady.
Bıyl Astana medısına ýnıversıtetiniń 1200-den astam qazaq jáne shetel stýdentteri oqýlaryn sátti aıaqtady jáne jumysqa kirisýge ázir. Oqý ordasynda Úndistan, Pákistan, Mońǵolııa, Reseı, О́zbekstan jáne Iordanııadan kelgen jas mamandar bilim aldy. Túlekter ınternatýra men bakalavrıat deńgeıinde 7 baǵyt boıynsha bilim aldy: «Jalpy medısına», «Stomatologııa», «Farmasııa», «Qoǵamdyq densaýlyq saqtaý», «Meıirbıke isi», «Kınezıoterapııa» jáne «Ergoterapııa». Olar tájirıbelik daǵdylaryn úzdik emhanalar men medısınalyq ortalyqtarda shyńdap, álemniń jetekshi ýnıversıtetterinde sheteldik tájirıbeni zerdeleýge múmkindik aldy.
«Sizder birneshe jyl buryn Medısınalyq ýnıversıtetke túsip, mańyzdy tańdaý jasadyńyzdar. Búgin bul qadamnyń sanaly jáne durys ekenin dáleldedińizder! Bizdiń oqytýshylar sapaly bilim alý úshin barlyq qajetti jaǵdaılardy jasap, boılaryńyzǵa adaldyq pen kásibılikti sińirdi! Aldaǵy ýaqytta sizder adamdarǵa qyzmet etý jáne naýqastardyń densaýlyǵyna qamqorlyq jasaý degen jaýapty mıssııaǵa kirisesizder. Aq halattyń abyroıyn saqtap, biliktilik pen bilimdi únemi shyńdaý mańyzdy», dep atap ótti óz sózinde oqý ornynyń rektory Qamaljan Nadyrov.
QR Densaýlyq saqtaý mınıstri Aqmaral Álnazarova túlekterdi quttyqtap, jas mamandarǵa qolda bar jetistikti odan ári damytý, zamanaýı tehnologııalar men tájirıbelerdi engizý, medısınalyq kómektiń sapasy men qoljetimdiligin jetildirý qajettigin atap ótti.
Jas mamandarǵa «AMANAT» partııasynyń atqarýshy hatshysy Dáýlet Káribek, belgili medısına qaıratkerleri, kásipkerler, ulttyq ǵylymı ortalyqtar men medısınalyq mekemelerdiń basshylary, ýnıversıtet oqytýshylary óz tilekterin bildirdi.
«Orbis Qazaqstan», «Sensata Group», «G-Park», «MIT» kompanııalarynyń ókilderi AMÝ bilim alýshylaryna 25 mln teńgeden astam somaǵa ataýly granttar men stıpendııalar taǵaıyndady. Kásipkerler jeke qarajattaryn daryndy jáne muqtaj stýdentterdi qoldaý úshin «AMU Endowment Development Fund» aýdardy.
Saltanatty is-shara barysynda Qaraǵandy medısına ýnıversıtetiniń, S.J. Asfendııarov atyndaǵy Qazaq ulttyq medısına ýnıversıtetiniń, Semeı medısına ýnıversıtetiniń, M. Ospanov atyndaǵy Batys Qazaqstan medısına ýnıversıtetiniń 17 úzdik túlegine de Astana qalasynda dıplomdar tabystaldy.
Áset Jarylqapov ınternatýrada oqýyn aıaqtap, jalpy dárigerlik praktıka boıynsha dıplomyn qolyna aldy. Jas maman bala kúngi armanyn oryndap, hırýrg bolýdy uıǵardy.
«Búgin men úshin tebireniske toly kún. Astana medısına ýnıversıteti maǵan kóptegen múmkindikter ashyp, dúnıetanymymdy keńeıtti. Tájirıbeli oqytýshylardyń arqasynda zaman talabyna saı bilim alyp, shet tilin meńgerip, oqý barysynda aǵylshyn tildi topqa aýysýǵa múmkindik berildi. Bir jyl boıy Eýropada sheberligimdi shyńdadym. Nefrologııa, radıologııa, hırýrgııa salalary boıynsha halyqaralyq jáne respýblıkalyq olımpıadalarda 8 júldeli orynǵa ıe boldym. Endi men hırýrgııany tańdap, oqýymdy odan ári jalǵastyramyn», deıdi AMÝ túlegi Áset Jarylqapov.
«Astana Opera» Memlekettik opera jáne balet teatry úshinshi jyl qatarynan Astana medısına ýnıversıtetiniń túlekterine dıplom tapsyrý rásimin tegin ótkizý múmkindigin usynyp otyr.
Atap ótken jón, bıyl ýnıversıtetiń negizi qalanǵanyna 60 jyl tolady. Osy ýaqyt aralyǵynda elimizdiń jetekshi ýnıversıteti densaýlyq saqtaý salasy úshin 30 myńnan astam joǵary bilikti mamandardy daıyndady. Ýnıversıtet ýaqyt talaby men qoǵam suranysyna saı oqý-tárbıe úrdisin únemi jetildirip keledi.
