Abý-Dabıdegi bolashaq energııasy sammıti

Birikken Arab ámirlikteriniń astanasy Abý-Dabıde «World Future Energy Summit 2015» (WFES) Dúnıejúzilik bolashaq energııasy sammıti óz jumysyn bastady. Tórt kúnge sozylatyn sammıttiń basty taqyryby eń zamanaýı tehnologııalarǵa jáne qoldaǵy múmkindikterdi tıimdi paıdalanýǵa negizdele otyryp, bolashaq energııasyn qalyptastyrý boıynsha birlesken sheshimderdi ázirleý bolmaq. Sondaı-aq, sammıtke qatysýshylar balamaly energetıkany damytý máselelerin talqylaıtyn bolady. Qazaqstan da Dúnıejúzilik bolashaq energııasy sammıtiniń jumysyna qatysýda. Abý-Dabıge «Astana EKSPO-2017» UQ» AQ delegasııasy keldi, ol bolashaqtyń taza ekologııalyq tehnologııa­laryn damytýmen aınalysatyn MASDAR kompanııasynyń basshylyǵymen, Qaıta qalpyna keletin energııa kózderi jónindegi IRENA halyqaralyq agenttiginiń basshylyǵymen jáne BAÁ medıa-keńesimen ekijaqty kezdesýler ótkizedi. Ulttyq kompanııanyń Halyq­aralyq qatynastar departamentiniń bas menedjeri Saıran Baıjahanov atap ótkendeı, eń sońǵy álemdik energetıkalyq trendtermen jáne energetıka salasyndaǵy eń jarqyn degen ınnovasııalyq jobalarmen tanysý múmkindigi Dúnıejúzilik bolashaq energııasy sammıtine qatysýdyń sózsiz artyqshylyqtarynyń biri bolyp tabylady. «World Future Energy Summit-qa qatysý jáne kórmege barý bizdiń jumysymyzdaǵy bas­ty kezeńderdiń biri bolyp tabylady.  Biz balamaly energetıka salasynda jemisti dıalog quryp, qyzyqty jańa jobalarmen tanysamyz dep úmittenemiz. Dúnıejúzilik sammıttiń taqyryby bizdiń EKSPO-2017 kórmesiniń taqyrybymen úndesedi. Búgin Abý-Dabıdegi kórmede bizdiń áleýetti seriktesterimiz, qaıta qalpyna keletin jáne balamaly energııa kózderi salasyndaǵy óz jobalaryn tanystyryp jatqan qatysýshylar bar. Bul olardy 2017 jylǵy kórmege shaqyrýǵa arnalǵan jaqsy alań», – dep atap ótti ol. Esterińizge sala keteıik, Qa­zaq­stan Birikken Arab Ámir­lik­teriniń EKSPO-2017 kórmesine qatysatyny týraly rastaýdy aldy. Kelissózder barysynda Dýbaı­daǵy EKSPO-2020 jáne Astana­daǵy EKSPO-2017 ókilderi 2017 jyly kórmege qatysý másele­lerin talqylady. Sondaı-aq, oǵan qaıta qalpyna keletin energııa kózderi jónindegi IRENA halyqaralyq agenttigi qatysady dep kútilýde. BAÁ Astanada úlken pavılondy almaq, onyń bir bóligi Masdar ınstıtýtynyń (Abý-Dabı) jobalarynan turatyn bolady. О́tkizilgen kelissózderdiń qory­tyndysy boıynsha BAÁ Astana­daǵy EKSPO-2017 kórmesine qaty­sýǵa úlken qyzyǵýshylyq tanytyp otyrǵanyn atap ótýge bolady. WFES sammıtinde 650 kompa­nııanyń stendteri usynylyp otyr, al spıkerler retinde halyqaralyq uıymdardyń (Halyqaralyq energetıka agenttigi, BUU qory jáne t. b.) ókilderi, sondaı-aq, álemdegi eń iri energetıkalyq kompanııalardyń basshylary sóz sóılemek. «Egemen-aqparat».