Zamany týdyrǵan bul adamdar týraly keńinen jazylmaı qaldy. Keı-keıde Charlz Chaplın kınolarynyń kesindilerin kórgende, meniń esime osy «jyndy Áben» týraly áńgimeler túsedi. Ol kisi ne istemegen deısiz ǵoı? Shaqpaq qant ıakı domalaq kámpıtti áýege laqtyryp qalady eken de, aýzymen qaǵyp alatyn kórinedi. Unamaǵan kisiden ozyp baryp, aldynda kele jatyp túkirgende, sońyndaǵynyń betine tıetini aıtylady (sol zamanda túsiretin sotkanyń joǵyn-aı, á?). Mundaı saıqymazaqtyǵy týraly uzyndy-qysqaly áńgimeler jeterlik.
Túrmeden de sol saıqymazaqtyǵynyń arqasynda aman qutylyp shyqqan. Tegin adam Sákenge serik bolsyn ba? Sákenniń tamyry retinde ustalǵanymen, tergeýshilerge jyndy kórinip bosaǵan. Uryp-soǵyp, azaptaýdyń neshe atasyn kórsetkenimen, abaqtydan bosatarda shyqpaı otyryp alypty. «Jatsam-tursam ıyǵymnan eki birdeı qaraýyl qoıyp, aman-saýlyǵymdy kúzettirip ustap edi. Bostandyqta endi meni kim kúzetedi?» dep eńkildep jylasa kerek.
Osynshama saıqymazaq kisiniń istiń yǵyn biletin sózge tapqyrlyǵy týraly da áńgime jeterlik. Ol kezde basqarma, kásipodaq basshylaryna kirip, máselesin sheship shyǵa beredi eken. Qar túse basqarmaǵa kirip, áńgimesin aıtyp, qyljaqtap otyrsa, buıymtaıyn surapty. «Mende jalǵyz attan basqa ne bar?» dep taıyp turypty. Basqa lám demegen. Erteńine qorasyna atynyń qystyq shóbi jetipti. Bir kezderi qarsha boraǵanymen, búginderi umytylýǵa aınalǵan osynshama kóp sózdiń jalǵyz túıini – aqyn Ǵalym Jaılybaıdyń «Jyndy Áben» atty óleńi. Bul shyǵarma tulǵanyń bar bolmysyn ashyp qana qoımaı, onyń ómirine qyzyqtyra túsedi.
«Tolqynnyń basylǵan joq sumdyq áni,
Ol kúnniń ashylǵan joq shyndyǵy áli.
Jamıǵat ańyz etken Jańaarqada,
«Jyndy Áben»?
Jyndyńyz ne, suńǵylany.
Kez ólgen jutatuǵyn aýadan «bal»,
Zamandas, ótken kúnnen saýal ańǵar.
...Men seniń saýlyǵyńa kúmándanam,
Ábendi «jyndy» ataǵan saý adamdar»
deıdi aqyn. «Jyndy Áben» týraly materıal jınap júrgender bar da shyǵar, kim biledi?
