Sýretti túsirgen – Natalıa Zınchenko
Oblys ortalyǵynda turǵyndardyń barlyq sanatyna arnalǵan bos jumys oryndary jármeńkesi ótti. Munda jalpy sany 70 uıym ózderindegi bos eńbek oryndaryn usyndy. Keıbir uıymdardyń usynystaryn bilmek oımen jumys izdegen jurtshylyq kádimgideı kezekke turdy. Oqýdy jańa bitirgen jas ta, qyryqtan asyp ketken jigit aǵasy da osy jerden tabyldy.
– Mundaı jármeńkeler jalpy qalada ýaqyt saıyn ótkizilip turady. Búgingi is-sharany keń aýqymdy ári jurtshylyq jıi serýendeıtin Ortalyq jaǵajaıda uıymdastyrýdy sheshken edik. Kútkenimizdeı adam kóp kelip jatyr. Azamattar jumys berýshilermen tikeleı tildesip, ózderin qyzyqtyrǵan suraqtaryna birden jaýap alady. Oqý oryndarynyń túlekteri, zeınet aldy jasyndaǵy adamdar bolsyn, turaqty ári tabysty jumys tapqysy keledi. Tipti keıbir adamdar istep júrgen jumysynan tabysy neǵurlym joǵary eńbek ornyn izdeı alady. Jármeńkege jalpy sany 70 jumys berýshi qatysyp,
1 100-den asa bos jumys ornyn usyndy. Kásiporyndardyń kóbine bilikti qyzmetkerler qajet, deıturǵanmen beıindi oqý ornynda bilim alǵan azamattar úshin de bos oryndar bar ekeni aıtylyp jatyr. Jumys berýshiler tek Pavlodar qalasynan ǵana emes, óńirimizdiń barlyq aýdanynan, Aqsý men Ekibastuz qalalarynan keldi. Máselen, oqýdy jańa támamdaǵan pedagog aýylda muǵalim bolyp eńbek jolyn bastaı alady. Aýyldarda jas mamandarǵa muqtajdyq bar. Ol jerlerde jalaqy da joǵary, aı saıyn qosymsha alatyn ústemeler qarastyrylǵan. Al eger jas mamandar otbasymen baratyn bolsa, jergilikti ákimdikter olardy baspanamen qamtýǵa járdemdesedi, – deıdi óńirlik eńbek utqyrlyǵy ortalyǵynyń dırektory Merýert Esembaeva.
Kelýshilerge túrli saladaǵy eńbek oryndary usynyldy: bank salasy, aýyl sharýashylyǵy, bilim berý, densaýlyq saqtaý, quqyq qorǵaý, ózen floty, azamattyq qorǵanys, t.b. Iri ónerkásiptik kompanııalar da bilikti kadr izdep kelipti. Olardyń ishinde «Kaýstık», «Rýbıkom», «Bogatyr Kómir», «Gofrotara», «Skıf Treıd» kásiporyndary kózge shalyndy.
Pavlodar ózen portynyń ókilderi ózderine qozǵaltqysh jóndeýshiler men aspazdar qajet ekenin jetkizdi.
«Eńbekaqy shamamen 200 myń teńgeniń tóńireginde bolady. Uıymymyz Ertis ózeninen qum qazyp, tasymaldaýmen shuǵyldanady. Qyzmetkerlerimiz qalqymaly krandar men teplohodtarda isteıdi. Jasy 35-ke deıingi er azamattar kerek. Dene kúshin qajet etetin jumys, keıde qyzmetkerlerimiz joǵaryǵa órmelese, endi birde barjadan teplohodqa sekirip júre beredi. Shıraq, myǵym azamattar qajet. Barlyǵyna ózimiz úıretemiz. Sondaı-aq aspazdar, port jumyskerleri de kerek», dep óz talaptaryn baıandady kompanııa ókilderi.
Al «Qazenergokabel» AQ-nyń jumys berýshileri orta býyndaǵy bilikti kadrlar 350 myń teńge eńbekaqy jáne ár toqsan saıyn jalaqysynyń 50-100 kóleminde syıaqy alatynyn aıtty. Munda óndiristik seh jumyskerlerin, jıyntyqtaýshy, júk ilýshi, menedjer, qamtý jónindegi ınjener, ınjener-synaýshylardy qabyldaýǵa daıyn. Buǵan qosa alıýmınııden sozba sym jasaıtyn seh qyzmetkerleri, qaıta oraýshy, aımaqtyq menedjerler de qajet.
«Promanalıt» JShS ókilderi de birqatar beıindi kadrlarǵa zárý ekenin bildirdi. Satý jónindegi menedjer, smetalaý ınjeneri, jobalaý ınjeneri sııaqty bilikti kadrlarǵa suranys bar.
Uıymdastyrýshylardyń sózinshe, mundaı aýqymdy jármeńke aldaǵy ýaqytta jalǵasyn tabady.
Pavlodar oblysy
