Baspanaǵa qarjyny bloger Gúlmıra Ábdrashevanyń oqyrmandary jınaǵan. Bul týraly volonter, bloger Nazym Janǵazy habarlady.
- Bir apta buryn Túrkistan oblysyndaǵy krızıs ortalyǵynda bolyp, 13 jyl quldyqta bolǵan 16 jastaǵy Naým (esimi ózgertilgen) men anasy týraly aıtqan edim. Búgin qýanyshty jańalyqty bóliskim kelip otyr. Naým týraly aıtqannan keıin meniń qurbym Gúlmıra Ábdrasheva men onyń oqyrmandary jınalyp, 23 saǵattyń ishinde 25 mıllıon teńge jınap bergen. Kelesi kúni eriktilermen Shymkentke bardym. Ol jerde anasy men balasynyń turǵylyqty mekenjaıyn aýystyrý týraly sheshim qabyldadyq, – deıdi Nazym Janǵazy.
Volonter ol aqshaǵa quldyqta bolǵan anasy men balasyna eki bólmeli páter satyp alynǵanyn málimdedi.
- Páter taza, jaıly, kórshileri meıirimdi. Páterdi qarap shyqqannan keıin birden qujattardy rásimdeýge bardyq. Ol jerde daǵdarys ortalyǵynyń ókili de boldy. Ázirge olar tolyqtaı áleýmettený jáne beıimdelý úshin daǵdarys ortalyǵynda qalyp otyr. Keıin olar jańa páterine kóship, ári qaraı daǵdarys ortalyǵy men bizdiń baqylaýymyzda bolady, – dep málimdedi Nazym Janǵazy.
Endi anasy men balasynyń qujattary rettelip jatyr.
