Fransııa prezıdenti Emmanıýel Makron ótken jyly elimizge saparynda el Prezıdenti Qasym-Jomart Toqaevpen birge asyq atqanyn kórdik. Osy kórinis asyq atýdy balanyń oıyny túrinde kóretin sanamyzǵa silkinis týdyrdy. Nasıhaty kemshin ulttyq sportymyzdyń osy túrin qazaq kúresi sııaqty deńgeıge kóterýge ne kedergi degen suraq kókeıimizde turdy. Sonyń nátıjesi bolar, osy naýryzda «Kóshpelilerdiń asyq sporty» halyqaralyq federasııasy qurylyp, asyq atý saıysy qyrkúıek aıynda Astanada ótetin dúnıejúzilik kóshpeliler oıyndary baǵdarlamasyna da endi.
«Alash saqasy» respýblıkalyq chempıonatyna qatysýshylardy Aqtóbe oblystyq ishki saıasat basqarmasynyń basshysy Álibek Baıneshov quttyqtap, Asyq atý federasııasynyń atqarýshy dırektory Azamat Manapov týrnırdi uıymdastyrǵan Jomart Sabyrjanuly men Asyq atý federasııasy Aqtóbe fılıalynyń jetekshisi Ábilqaıyr Sotqarovqa alǵysyn jetkizdi. «Qazaq kúresi» federasııasynyń tuńǵysh prezıdenti Erǵalı Muhıtdınov pen Syr óńirinde «Qazaqstan barysyn» uıymdastyrǵan Sadyq Mustafaev «Alash saqasyn» «Qazaqstan barysy» deńgeıine jetkizýge kúsh salýǵa shaqyrdy. Osydan keıin Qaraǵandy oblysynan kelgen ulttyq sanattaǵy tóreshi Amangeldi Nurmuhanov sý tasqynynan zardap shekken kópbalaly ana Elvıra Nurjaýǵanqyzyna saıysqa qatysýshylar atynan qarjylaı kómek tabystady.
Asyq atý – adamnyń surmergendik qyryn anyqtaıtyn, sabyrlylyqqa úıretetin oıyn. Oza shapqan saıypqyrandardy Jomart Sabyrjanuly bastaǵan tóreshiler anyqtaı bildi. 30 qatysýshynyń arasynan Túrkistan oblysynyń asyqshysy Amandos Aıtqulov oza shyǵyp «Alash saqasyn» ıelendi. Ekinshi orynǵa Aqtóbe oblysynyń mergeni Ǵaryshbek Qulybek laıyqty dep tanylsa, úshinshi oryn Pavlodar oblysynan kelgen Jomart Nurlanov pen Qýanysh Qabyldaǵa buıyrdy. Týrızm jáne sport mınıstrliginiń Sport jáne dene shynyqtyrý isteri komıteti Amandos Aıtqulovqa altyn belbeý men 300 myń teńge jáne bapkerine 100 myń teńge syıaqy berdi. Ǵaryshbek Qulybek saıystan kúmis belbeý taǵyp, 200 myń teńge ıelenip qaıtsa, onyń bapkerine 75 myń teńge berildi. Úshinshi orynǵa ilikken Jomart Nurlanov pen Qýanysh Qabylda 100 myń teńgeden syıaqy alyp, qos qola belbeýge qol jetkizdi. Olardyń qos bapkeri 50 myń teńgeden syıaqy aldy.
Tuńǵysh saıysqa demeýshilik etken «Qazhrom» TUK» AQ bas dırektory Sergeı Prokopevke Azamat Manapov federasııa atynan Alǵyshat pen «Altyn saqa» tósbelgisin, Jomart Sabyrjanuly arnaıy quıylǵan saqany syıǵa tartty. Kórermenderdiń ystyq yqylasyna qaraǵanda, aldaǵy ýaqytta «Alash saqasy» el arasynda keńinen tanymal bolady degen senim bar.
Aqtóbe oblysy
