Týrıstik tartymdylyqty arttyrý, resmı jáne qalalyq is-sharalardy ótkizý kezinde biryńǵaı stıldi qalyptastyrý, qalanyń ashyq keńistiginde, kádesyı ónimderin, ınternet-resýrstar men áleýmettik jelilerdi paıdalaný maqsatynda Pavlodar qalasynyń ákimdigimen logotıp pen deskrıptordy qamtıtyn «Erke Ertistiń jaǵasynda...» fırmalyq stıl ázirlendi.
«Jańa grafıkalyq kórinisi kóptegen tarıhı jáne ıdeologııalyq maǵynany biriktirdi. Logotıptegi tańba tolyǵymen «PVL» abbrevıatýrasynan jasalǵan. Abbrevıatýra túrki jazýyna, «О́leńti jazbalary» petroglıfterine, «Qoshqar múıiz» qazaq ulttyq oıý-órnegine jáne «Qazqonaq» paleontologııalyq eskertkishine negizdelgen. Qysqa ári mınımalıstik shrıft tańdaldy. Logotıptiń kórnekti bóligin keremetteı tolyqtyryp turǵan júrek tárizdi element jáne ol oǵan ózindik erekshelik berip, óz qalasyna degen súıispenshilikti bildiredi. Qalamyzdyń Qımaq qaǵanatynan búginge deıingi damý tarıhy Ertis ózenimen tyǵyz baılanysty. Ertis – tabıǵı shoǵyrlandyrýshy ıdeıa, túrli tarıhı dáýirdiń únsiz kýágeri. Barlyq urpaq býynyn shoǵyrlandyrý jáne qalanyń oń kórinisin berý maqsatynda «Erke Ertistiń jaǵasynda...» deskrıptory usynyldy», dep habarlady Pavlodar qalasynyń ákimdiginen.
Tús gammasy negizgi tústerdiń úılesimdi jáne mınımalıstik úılesiminde keltirilgen: kók, jýsan, qyzǵylt sary-qum jáne kógildir. Bul – aspannyń, Qazaqstan týynyń, Ertis – Baıan dalasynyń jáne Ertis sýlarynyń tústeri.
Fırmalyq stıl ıdeıasy baı tarıhı joldy, mádenı áralýandylyqty, ashyqtyq pen qonaqjaılylyqty, tabıǵattyń biregeıligin «Tarıh-Jańǵyrý-О́rleý» jalpy leıtmotıvimen kórsetýge tyrysqan.
PAVLODAR
