Kisi kelbeti beınelengen tylsym eskertkish óńirde alǵash ret kezdesip otyr. Jádigerdiń qaı dáýirge jatatyny týrasynda ǵalymdar ártúrli pikir bildirip jatyr. Máselen, Á. Marǵulan atyndaǵy Arheologııa ınstıtýtynyń aǵa ǵylymı qyzmetkeri Sergeı Iаrygın músinniń qola dáýiri mádenıetine tuspa-tus keletinin alǵa tartady. «Jádiger rasymen erekshe. Kisiniń kelbeti, anatomııalyq elementteri jaqsy kórsetilgen. Kózi, murny, erini men beti anyq ańǵarylyp tur. Osyǵan uqsas jádigerler qola dáýirindegi Ortalyq Azııa men Shyǵys Eýropada kóptep tabylǵan», deıdi ol.
Al L. N. Gýmılev atyndaǵy Eýrazııa ulttyq ýnıversıtetiniń ǵylymı qyzmetkeri Danııar Tileýǵabylovtyń derekteýinshe, bul – ejelgi túrik mádenıetine tıesili jádiger. «Bul jerde dinı rásimder oryndalatyn úlken ǵıbadathananyń orny bolýy bek múmkin. Sol sebepti tas-músin egjeı-tegjeı zerttelip, onyń aınalasy da ǵylymı nazardan shet qalmaýy kerek».
Ǵalymdardyń oljasynan keıin Jabaı ózeniniń jaǵasyndaǵy qazba jumystary bastalyp ketti. Arheologter birneshe qysh ydystar men jambas súıekterdi taýyp, olardy radıokómirtekti taldaýǵa joldap jatyr. Oblystyq tarıhı-mádenı murany qorǵaý jáne paıdalaný ortalyǵynyń dırektory ári ekspedısııa basshysy Jasulan Úkeev bylaı deıdi: «Qazir «Sandyqtaý-3» qorymy» kúrdeli zerttelý ústinde. Búgingi kúni ol jaqtan buryn-sońdy zerttelmegen 158 «murtty qorǵan» tabylyp otyr. Endi Jabaı ózeniniń boıyndaǵy qonystyń ornyn tabý kerek. Qarap otyrsaq, tas dáýirinen orta ǵasyrlarǵa deıingi barlyq arheologııalyq eskertkishti qamtıtyn úlken keshenge aınalaıyn dep tur».
