Foto: Jetisý oblysy ákimdigi
Bıylǵy jyldyń sońyna deıin atalǵan jol tómengi asfalt jabynymen kólik qozǵalysy úshin ashylady dep josparlanǵan. Al asfalttyń betki qabaty men abattandyrý jumystary tolyǵymen 2025 jyly aıaqtalady.
Qazirgi kezde Lepsi aýylynan Balqash kóliniń jaǵalaýyna deıingi 27 shaqyrym avtokólik jolynyń qaıta jańǵyrtý jumysy aıaqtalyp, qoldanysqa berilgen. Al «Molaly-Lepsi-Aqtoǵaı» ýchaskesindegi 105 shaqyrymda qurylys jumystary júrip jatyr. Sonyń ishinde 71 shaqyrymyna eki qabat asfalt tóseldi, qalǵan 34 shaqyrymyndaǵy qurylys jumystary jyldyń sońyna deıin aıaqtalady deıdi mamandar. Osylaısha bıylǵy jyldyń aıaǵyna qaraı Balqashqa aparatyn jol tómengi jabynymen avtokólik quraldary úshin ashylady. Al betki qabaty men jol jıegin abattandyrý jumystary - jol belgileri, jol syzyqtary, metall tosqaýyldar, demalys aımaǵy, sanıtarlyq beket ornatý – barlyǵy kelesi jyldyń jazǵy shomylý maýsymyna deıin tolyq aıaqtalady.
«Qazir qurylysqa 90-ǵa jýyq arnaıy tehnıka jumyldyrylǵan. 25 adam asfalt jamylǵysyn salýǵa, 50 adam jer tósemi jumystarynda, taǵy 50 adam zaýyttaǵy asfalt daıyndaý, untaqtaý, materıaldardy óńdeý, tasymaldaý jumystarynda – jalpy sany 130-ǵa jýyq adam jumys istep jatyr. Lepsi aýylynan Balqash jaǵalaýyna deıingi joldyń bastapqy eni 6 metr bolsa, jańǵyrtylǵannan keıin 8 metrge ulǵaıtyldy, al 105 shaqyrymynyń eni 7-den 9 metrge ulǵaıtyldy. Sonymen qatar jobada 67 dana sý ótkizý qubyrlary tolyǵymen aýystyryldy. Eki kópir salyndy. Joba iske asyrylǵanǵa deıin osy jolmen qatynaıtyn jol kólikteriniń aǵyny táýligine 3 myń avtokólik bolsa, qaıta jańǵyrtýdan keıin bul kórsetkish 6 myńǵa joǵarylap otyr. Bul týrıstik aımaqty damytýǵa basty serpin beretin joba bolyp otyr», deıdi oblystyq jolaýshylar kóligi jáne avtomobıl joldary basqarmasy basshysynyń orynbasary Aıdos Dosjanov.
Bul rette jobany iske asyrý barysynda qurylys qunynyń qymbattaýyna baılanysty oblys ákimi Beıbit Isabaevtyń tapsyrmasyna sáıkes Balqashqa deıingi jol salý jumysyna oblystyq bıýdjetten qosymsha 15,9 teńge qarjy bólindi. Sonyń 5,5 mlrd teńgesi bıylǵy jyly bólindi, qalǵan qarajat 2025 jyly bólinedi. Balqash kóline deıingi jol qurylysy jobasynyń jalpy quny – 30,4 mlrd teńge.
Jalpy bıyl oblystyń jol salasyn damytýǵa 37,9 mlrd teńge qarajat bólindi. Osy qarajatqa oblystyq mańyzy bar avtokólik joldardy jóndeýge arnalǵan 29 joba iske asyrylyp, 54 eldi mekenniń ishki kósheleri jóndeledi.
Sol sııaqty oblys aýmaǵynda respýblıkalyq mańyzy bar iri jobalar da iske asyrylyp jatyr. Úsharal-Dostyq joly iske qosyldy jáne búgingi kúnge Taldyqorǵan-Úsharal avtojolyn jóndeý 95%-ǵa oryndaldy, nysan tolyǵymen 2024 jyldyń sońynda aıaqtalady dep josparlanǵan. Sondaı-aq Saryózek-Kóktal, Jarkent-Qorǵas avtojoldary jóndeýden ótip jatyr.
