Foto: olympic.kz
UOK Parıj Olımpıadasynda 63,5 keli salmaqta judyryqtasqan Muhammedsabyr Bazarbaıuly men grýzııalyq Lasha Gýrýlı arasyndaǵy jekpe-jek nátıjesin túsindirýdi talap etip, resmı túrde PBU-ǵa (Paris boxing Unit) shaǵym túsirdi.
«Biz bul nátıjemen kelispeımiz jáne PBU-dan túsiniktime talap ettik. Budan Halyqaralyq olımpıadalyq komıtet te habardar. Bizdiń oıymyzsha, el boksshysy 2024 jylǵy Olımpıadanyń jartylaı fınalyna joldama beretin mańyzdy kezdesýde jeńiske jetti. О́tken jekpe-jektiń nátıjesin qaıta qaraý múmkin emestigin de túsinemiz. Alaıda biz iri halyqaralyq jarystaǵy tórelik ádil ári taza bolǵanyn qalaımyz», dedi Qazaqstan UOK bas hatshysy Janar Ýtesheva.
Aıta keteıik, bul shaǵym ótken kezdesýdiń nátıjesin ózgertpeıdi. Dese de tóreshiniń burmalaýy aıǵaqtalsa ol boks básekelerinde qazylyq etýden shettetiledi.
UOK buǵan deıin de Qazaqstan boksshylarynyń jekpe-jeginde tórelik etken jekelegen tóreshilerge qatysty PBU-ǵa eskertý jasaǵan. Komıtet eskertý qabyldanyp, qazirgi tańda zertteý júrgizilip jatqanyn jetkizdi.
