Nurtas pen Shyǵanaq

Bul fotonyń avtory kim, qaı jyly tú­si­rildi, naqty bilmeı­miz. Alaıda Nurtas Ońdasy­nov qyzmet babymen Aqtóbege oblysyndaǵy Shy­ǵanaqtyń aýlyna baryp, ekeýiniń ta­ry ósip jatqan alqapta kez­des­kenin anyq baıqaımyz. Eki aza­mattyń bir-birine jyly iltıpat bildirip, kúlimsirep turǵan sátin fototilshi qalt ji­bermegen. Biraq ol bul sý­rettiń jyldar ótkennen keıin qundy jádigerge aınalatynyn sol kezde sezbegen bolar.

Bıyl 120 jyldyǵyn atap ótip otyrǵan  Nurtas Oń­dasynovtyń ómiri, qyzmeti, qaıratkerligi kóziqaraqty qaýymǵa jaqsy tanys. Al keıingi jas býyn Shyǵanaq Bersıevtiń esimin bile bermeıdi. Aqtóbe oblysy­nyń Oıyl aýdanynda ómirge kelgen maıtalman tary ósirý­shi basqarǵan zveno uzaq jyldar boıy shóleıtti aımaq­tyń aýa raıyna qaramastan tarydan mol ónim alǵan. Dáli­rek aıtqanda, 1939 jyly tary­nyń ár gektarynan 25,5 s ónim alsa, 1940 jyly – 155,8 s, 1941 jyly – 165 s, 1942 jyly – 175 s, 1943 jyly 201 s ónim jınaǵan. Mundaı joǵary nátıjege  ol janqııarlyq eńbeginiń arqasynda ǵana emes, tary tuqymyn kútip-baptap, egisti der kezinde júrgizip, ónimdi ysyrapsyz jınaý arqyly qol jetkizgen. Sondaı-aq Shyǵa­­naq Bersıev Ekinshi dúnıejúzi­lik soǵys kezinde áskerı ushaq jasaý úshin memleket qory­na qomaqty qarjy aýda­ryp, óz ­tabysynan tary ótkiz­gen. Onyń ómiri men eńbegin kór­nekti jazýshy Ǵabıden Mustafın «Shyǵanaq» romanyna arqaý etse, nemis dramatýrgi Bertold Breht «Tary ósirýshi» atty dastan jaz­ǵan. Bir sózben aıtqanda, qandaı bıikke kóterilse de, qazaqy minezinen, qarapa­ıym­dylyǵynan aınymaǵan qos tulǵanyń beınesi saqtalǵan sýrettiń ýaqyt ótken saıyn quny arta túseri anyq.