Qazir munda jaıaý júrginshiler men velosıpedpen qydyrýshylarǵa arnalǵan arnaıy jol salynyp jatyr. Ortalyq jaǵajaı da keńeıtiledi. Qalalyq TKSh bóliminiń basshysy Azamat Begalınniń aıtýynsha, «Shaǵalany» abattandyrý jumysy qala kúni qarsańynda aıaqtalýǵa tıis. Jalpy, Qostanaıda úlkendi-kishili 68 saıabaq bar. «Taza Qazaqstan» aksııasynyń aıasynda bıyl sonyń bári abattandyrylady. Mysaly, trıatlon parkine sýarý júıesi tartylyp, jaryq ornatyldy. Oryndyqtar qoıylyp, balalar jáne sport alańdary salyndy. Onyń Tobyl ózenine shyǵatyn joly bolady. Jeńis saıabaǵyndaǵy oryndyqtar men qoqys jáshikteri tolyǵymen aýystyryldy.
Kópshilikpen birge senbilikke shyqqan oblys ákimi Qumar Aqsaqalov úzilis kezinde sáýirde bastalǵan ekologııalyq aksııanyń maqsaty tek kóshe sypyryp, aǵash otyrǵyzý ǵana emes, Prezıdent búginde halyqtyń ekologııalyq mádenıetin qalyptastyrýǵa úlken mán berip otyrǵanyn aıtty.
«Bárimiz taza kóshemen júrip, taza saıabaqta serýendegimiz keledi. Al onyń bárin taza ustap turý tek ózimizge baınalysty. Memleket basshysynyń bastamasymen qolǵa alynǵan «Taza Qazaqstan» baǵdarlamasy aımaqtardy tazartýmen shektelmeıdi. Bul – ekologııalyq mádenıetti qalyptastyrýǵa baǵyttalǵan úlken ıdeologııalyq is-shara. Búginge deıin oblystyń 370 myńnan asa turǵyny senbilikke qatysyp, 113 zańsyz qoqys alańy joıyldy. Oblys aýmaǵyndaǵy 300-den asa saıabaq tazartyldy. Sýburqaqtar qalpyna keltirilip, aýqymdy abattandyrý jumystary atqaryldy. Bıznes ókilderimen kezdesý barysynda «Taza Qazaqstan» jobasy jóninde sóz qozǵalyp, aýyl-aımaqtardy abattandyrýǵa qatysty memorandýmǵa qol qoıyldy. Oblys turǵyndaryn da osy is-sharaǵa belsendi qatysyp, eldi kórkeıtýge úles qosýǵa shaqyramyn», dedi oblys ákimi.
Senbilik barysynda ákim aldaǵy ýaqytta qalalyq jaǵajaı aýmaǵynda jazǵy stadıon salynatynyn aıtty.
Qostanaı oblysy
