Foto:Jambyl oblysy PD
«Almaty-Ekaterınbýrg» tas jolynda «Qarasora-2024» jedel-profılaktıkalyq is-sharasy júrgizilip, patrýldik polısııa qyzmetkerleri kınologtarmen birge Lexus ES 350 kóligin toqtatqan. Júrgizýshiniń qujattaryn tekserý kezinde jolaýshy kólikke benzın shashyp, órtep jibermek bolǵan. Alaıda órtti polısııa qyzmetkerleri der kezinde sóndirip úlgergen.
«Atalǵan kólikti Lettı atty qyzmettik-izdestirý ıtimen tekserý kezinde artqy júk salǵyshynan 4 polıetılendik qapshyqqa oralǵan ótkir ıisti, esirtkige uqsas zat tabylyp, tárkilendi. Saraptama qorytyndysyna sáıkes tárkilengen zat salmaǵy 105 kelige jýyq keptirilgen marıhýana ekeni anyqtaldy», dep habarlady Jambyl oblysynyń PD baspasóz qyzmeti.
Atalǵan faktige baılanysty qylmystyq is qozǵalyp, kúdiktiler Shý qalasynyń ýaqytsha ustaý ızolıatoryna qamaýǵa alyndy.
