Petropavl qalasynda tórt adamnan turatyn uıymdasqan qylmysker toby bıyl qańtar–aqpan aılarynda stýdentterdi qorqytyp, sondaı qylmystar jasaǵan. Jastary 20 men 23 aralyǵyndaǵy buzaqylardyń úsheýi buryn sottalǵan bolyp shyqty. Olar qaltaly stýdentterdi ańdyp, olardyń qymbat dúnıelerin tartyp alýmen qatar jaldaǵan páterlerine alyp kelip, uryp-soǵyp qorqytý arqyly onlaın nesıe alǵyzǵan. Ásirese bir jaldamaly páterde turatyn aýyldy jerden kelgen kolledjdiń 18 jasar oqýshysy buzaqylardan qatty japa shekken. Qaraqshylar onyń áleýmettik jelidegi jazbalaryna nazar aýdarǵan. Onda baıǵus stýdent óziniń baılyǵymen, ustaǵan dúnıeleriniń qymbattyǵymen maqtanǵan. Ony kórgen buzaqylar stýdenttiń sońyna túsip, aqyry ony jaldamaly páterge alyp kelip, qoqan-loqy kórsetilip, kúsh qoldaný arqyly barlyq aqshasyn tartyp alýmen qatar, qymbat telefonyn 50 myńǵa satqyzyp, aqshalaryn qaltalaryna basqan. Qorqytyp alǵyzǵan nesıelerin de tartyp alǵan. Bir joly, stýdent úıinde joǵynda, esigin buzyp kirip, 70 myń teńgeniń dúnıesin urlap ketken.
Jas bozbala quqyq qorǵaý organdaryna shaǵynýǵa qoryqqan, óıtkeni buzaqylar onyń paıdasyz ekenin, ózderiniń olarmen sybaılas ekenin aıtyp, balany psıhologııalyq turǵydan ábden basyp tastaǵan. Ata-anasy alysta, mańynda basqa da jaqyndary joq bozbala sóıtip, qaraqshylarǵa ábden jem bolyp, barlyǵy 400 myń teńgeniń aqshasy men dúnıesinen aıyrylǵan.
Oblystyq PD bastyǵynyń orynbasary, polkovnık Asqar Muhametqalıevtiń aıtýyna qaraǵanda, oqý oryndary men múddeli memlekettik organdar arasynda ózara is-qımyldy tıimdi iske asyrý sheńberinde júrgizilgen profılaktıkalyq sharalardyń birinde bopsalaýǵa ushyraǵan stýdent jedel ýákilderge júginip, basynan keship júrgen qasiretin aıtqan. Sóıtip, UQQKB qyzmetkerleri qylmyskerlerdi dereý ustaǵan.
Petropavl qalalyq sotynyń sheshimimen qaraqshylar Qylmystyq kodekstiń qorqytyp aqsha alý, bas erkinen aıyrý, urlaý jáne denege orta dárejedegi jaraqat salý salý baptary boıynsha sottalyp, úsheýine 4-ten 8 jyl aralaryndaǵy bas erkinen aıyrý jazasy berildi. Al buryn sottalmaǵan tórtinshisi 4 jyldyq shartty jazaǵa kesildi.
PETROPAVL
