Sýretti túsirgen – Serik MAEMEROV
Qazirgi tańda Aqtaý qalasyn jan-jaqty damytý máselesi talqylanyp, usynystar tyńdalyp, mamandar tarapynan sarapqa salynyp jatyr. Jergilikti atqarýshy bılik turǵyndar men týrısterge qolaıly jaǵdaı jasaý úshin oblys ortalyǵyn sońǵy úrdisterge saı kórkeıtý baǵytyn basty nazarǵa alǵan.
Mańǵystaý oblysynda óńir basshysy Nurdáýlet Qılybaı otandyq jáne sheteldik jobalaý kompanııalary ókilderimen birge Prezıdent tapsyrmasyna oraı Aqtaýdyń ýrbanıstıkalyq damý josparyn talqylady. Basqosýda Túrkııa, Belarýs, Qazaqstannyń belgili sáýletshileri Aqtaý qalasyndaǵy teńiz jaǵalaýyn abattandyrý, qaıta qalpyna keltirý, damytý baǵytyndaǵy erekshe jobalaryn usyndy. Jobalaý kompanııalarynyń ókilderi «Samal» shaǵyn aýdanynan bastap «Soldat jaǵalaýyna» deıingi aralyqqa zamanaýı úlgide saıabaq, sport alańdaryn, birkelki stılde pavılondar, qurǵaq sýburqaq, ashyq qoǵamdyq basseın men pırs salýdy josparlap otyr. Sonymen qatar olar týrısterdiń mekenine aınalǵan Aqtaýdy ulttyq naqyshta aıshyqtap, qazaqy qundylyqty tanytý maqsatynda «Áýendi dombyra» atty úshsatyly monýment pen «Parýs» kireberis stellasyn ornatýdy usyndy.
«Aqtaý elimizdegi damý men mádenıettiń, sondaı-aq ulttyń tarıhı baılyǵynyń teńiz jaǵasyndaǵy shynaıy kórinisi bolýy kerek. Bul jumysta oı men qııaldy, bilim men sheberlikti toǵystyra otyryp, Aqtaýdyń ajaryn arttyramyz. Tyń ıdeıalar men usynystar áli de sarapqa salynyp, eń úzdik degen jobalar irikteledi», degen oblys ákimi N.Qılybaı qala qurylysyna jaýapty tulǵalar men sáýletshilerge usynylǵan jobalardy jınaqtap, Aqtaýdy kórkeıtýdiń tujyrymdamasyn jasaýdy tapsyrdy.
Týrıster kóp keletin mańǵaz Mańǵystaýdaǵy biregeı qala, teńiz jaǵalaýyndaǵy jalǵyz qala – Aqtaýdyń ajary memlekettiń mereıi, mádenıet pen tazalyqtyń, sondaı-aq ulttyq dilimizdiń kórinisi bolýy qajet-aq.
Mańǵystaý oblysy
