- Prezıdentpen qashan kezdestińiz? Aralaryńyzda qandaı áńgime boldy? - dep suraıdy jýrnalıst.
Ákim taǵaıyndalǵannan keıin úsh kúnnen soń «Prezıdenttiń qabyldaýynda bolasyz» degen habar kelgenin esine aldy.
- Men úshin kútpegen jaǵdaı, buryn-sońdy Prezıdentpen kózbe-kóz otyryp sóılesip kórmegen, qabyldaýynda bolmaǵan adammyn. Prezıdenttiń qabyldaýynda boldym. Árıne, Qasym-Jomart Kemelulynyń beretin tapsyrmalarynyń barlyǵy - osy eldiń ósýi-órkendeýi, turmystyq jaǵdaıynyń jaqsarýy. Ár salany qozǵady: medısına da bar, bilim de bar. Mańǵystaýda bilim kórsetkishi jaqsy bolyp turǵan joq. Investısııa tartý, týrızmdi damytý degen sııaqty ártúrli baǵytta tapsyrma berdi. Men ol kisige qoshtasardyń aldynda «Qasym-Jomart Kemeluly, ruqsat pa, ishimde ketip qalmasyn, kókeıimde turǵan bir suraq bar», dedim. «Aıtyńyz» dedi. Ashyǵyn aıttym. «Buryn-sońdy joǵary laýazymǵa qoly uzyndaý, tanysy bar kisiler taǵaıyndalatyn edi. Jańaózen degen jerde júrgen qazaqtyń qarapaıym jigiti edim, bir kúnniń ishinde qalaı bolyp ketkenin túsinbeı qaldym» dedim. Ol kisi «syrtyńyzdan zerttedik, sizdi bir kúnniń ishinde taǵaıyndap tastaý nemese qoly uzyn kisiler týraly suraǵyńyzǵa qysqasha jaýabym: bul − basqa Qazaqstan» dedi. Men bul suraqty Prezıdentke qoıdym. Eki aýyz sózben «basqa Qazaqstan» dep jaýap berdi, - dedi Nurdáýlet Qılybaı.
