Sýretti túsirgen – Qushtar Rashat
Búgingi jas – erteńgi otbasynyń otaǵasy, al otbasy Otanymyzdyń irgetasy ekeni belgili. Osyndaı qundylyqty kózdegen is-shara Astana qalasynan bastaý alyp, Býrabaı ulttyq parkinde jalǵasty.
Balalarǵa ulttyq qundylyqtar men tálim-tárbıeni tereńnen sińirý maqsatynda tarıh ǵylymdarynyń doktory, professor Jambyl Artyqbaev, arheologııa jáne etnologııa magıstri Turar Sháken, pedagog-sarapshy, psıholog-konsýltant Juldyz Jańabergenova, ulttyq qundylyqtardy dáripteýshi Úsibáldi Saǵadildá syndy tulǵalar dáris oqydy. Is-shara eki kúnge sozyldy. Atalǵan kýrs barysynda «Qabanbaı», «Qobylandy», «Alpamys» atty úsh topqa bólingen 60-qa jýyq bala «Qazaq tarıhy men dástúrleri», «Maqal mátelderdegi ulttyq tárbıe», «Jigittiń úsh jurty» syndy teorııalyq jáne praktıkalyq sabaqtarǵa qatysty.
Teorııalyq sabaqtardan soń, jasóspirimderge qolǵa sý quıý, mal soıý, jilikteý, tabaq tartý, samaýryn qaınatý, atqa miný, sadaq atý syndy praktıkalyq dástúrli daǵdylarǵa saı sabaqtar ótkizildi. Mundaı áserli áreketterden keıin balalarǵa kıiz úıdiń ishine kınoteatr qurylyp, rýhanı tárbıelik mańyzy bar fılmder kórsetildi.
Teorııa men tájirıbeni ushtastyrǵan sharany qorytyndylaı kelgende, kýrsqa qatysqan balalar men ata-analar rızashylyǵyn bildirip, «Kemel jigit – kúıeý bala» atty ulttyq zııatkerlik kýrsy jalǵasyn tabýyn ótindi.
Atalǵan sharada árbir bala rýhanı azyqqa kenelip, ultqa, týǵan jerge, mádenıetimiz ben ádebıetimizge, taǵylymdy tarıhymyzǵa degen qurmetin arttyrǵanyna senimimiz mol.
