Qalada dál osyndaı 38 úı bar. Olardyń árqaısysy úsh qabattan turady. Fızıka zańdaryna qaıshy keletin bul zamanaýı ári erekshe stıldi ǵımarattar týrısterdiń nazaryn eriksiz aýdarady. Tipti tizbektelgen tekshe tárizdi úıler bir qaraǵanda jer ústinde qalqyp turǵandaı kórinedi. Sáýletshi Pıet Blom sol sebepti de óz jobasyn «Qala ishindegi qala» dep ataǵan.
Gýver bógeti
Kolorado ózeni arqyly ótetin orasan zor bóget 60 qabatty ǵımarattyń bıiktigindeı deńgeıde ornalasqan jáne 1,3 mıllıon turǵyn úıge jetkilikti elektr energııasyn óndiredi.
Bóget salý jumystary Kolorado ózeninde 1931 jyly bastalyp, bes jylda aıaqtalǵan. Qurylystyń uzyndyǵy – 379 metr, bıiktigi – 221 metr. Ol 20 jyl boıy álemdegi eń bıik bóget bolyp sanalǵan. Búginde álemdegi eń bıik bóget – Vahsh ózenindegi Ragýn bógeti. Onyń bıiktigi – 335 metr.
Qarapaıym bolsa da qadirli
Sáýlet óneri neǵurlym erekshe bolsa, soǵurlym tanymal. Buǵan sáýletshiniń qaıtalanbas ıdeıasy, tipti qurylysshynyń qateligi sebep bolady. Al keıde qarapaıym ári kreatıvti óner týyndysyna jurttyń yntasy men yqylasy erekshe artyp turatyny taǵy bar.
Máselen, «Hang Nga» qonaqúıine bir qaraǵanda, ol ózi osyndaı bolyp jer astynan ósken, al adamdar ony qonaqtar qabyldaýǵa azdap qana beıimdegen sııaqty áser týǵyzady. Al shyndyǵynda, ǵımarat tolyǵymen vetnamdyq sáýletshi Dang Vet Nganyń qolynan shyqqan. Ol qonaqúıdiń dızaınyn janýarlar, sańyraýqulaqtar sııaqty tabıǵı elementtermen bezendirgen. Qonaqúı osynshalyqty qarapaıym bolsa da, tabıǵatpen tamyrlasyp jatqany úshin munda keletin týrısterdiń qarasy óte kóp.
