«Mys óndiretin kompanııaǵa aımaq turǵyndary dán rıza. Prezıdenttiń shaqyrýymen kompanııa tasqynnan zardap shekkenderge 481 páter alyp berý úshin 8,5 mlrd teńge qarastyrdy. Sondaı-aq jańa 80 úıdiń qurylysyna 2,2 mlrd teńge bóldi», deıdi «Qyzyljar Asar» korporatıvtik qorynyń jetekshisi Qanat Omarov.
Jańadan turǵyzylatyn kóterilim stansasyna elektr qýatyn úzdiksiz jetkizip turatyn 3,5 shaqyrymdyq jerasty kabeli jergilikti bıýdjetten bólinetin qarajatqa tartylmaqshy. Stansa aınalasyndaǵy bógetti de nyǵaıtý josparlanǵan. Byltyr sý eski bógetten asyp, alyp seń stansany talqandap ketken. Endi ony barynsha bıik ári berik qylyp ornatý qajettigi týyndady. Sondaı-aq Oıqalada qosymsha sorǵy stansasyn ornatý kózdelgen. Qazir onyń jobalyq-smetalyq qujattamasy ázirlenip jatyr.
Jýyrda sorǵy stansasynyń qurylysyn baqylaýǵa oblys ákimi Ǵaýez Nurmuhambetov baryp, jyl aıaǵyna deıin aıaqtalýy josparlanǵan nysannyń qazirgi ahýalyn kórdi.
«Sorǵy stansasyn qalpyna keltirý men jańǵyrtý oblys ortalyǵy turǵyndaryn taza aýyzsýmen úzilissiz qamtamasyz etý úshin óte mańyzdy. Al qosymsha sorǵy ornatý – bolashaqta bolýy múmkin tasqynnyń aldyn alýǵa qajet», dedi aımaq basshysy.
Petropavldyń qysqa daıyndyǵynyń eń úlken krıterııi – qala men oblysty jylý jáne jaryqpen qamtamasyz etetin JEO-2-niń saqadaı saı bolýy. Osy ýaqytqa deıin onyń shýly dabyrasy talaı shyǵyp, respýblıka turǵyndaryna tanymal bolǵan. Aldymen 2022 jyly naýryzda tútin shyǵaratyn 150 metrlik bir murjasy ortan belinen qulady. Ol bir adamnyń ómirin qıyp ketti. Qalpyna keltirile bastaǵanda qısaıyp órilip bara jatqany anyqtalyp, túp-ornymen qaıta qulatyldy. Qazir irgetasynan qaıta órilip jatyr. Soǵan qaramastan byltyrǵy aýyr qysta basqa murjalar syr bermeı, barlyq qazandyq qalypty jumys istep, eshqandaı jamanshylyqqa dýshar etken joq. Solaı desek te kásiporynnyń bıylǵy qysqa daıyndyǵy Úkimet pen jergilikti bıliktiń nazarynda.
О́tken aıda oblysqa kelgen Premer-mınıstrdiń birinshi orynbasary Roman Sklıar jylý berý maýsymyna daıyndyq barysymen tanysý úshin aldymen osy JEO-ǵa bardy. Kásiporyn jabdyqtarynyń 57,3%-ǵa tozǵany, jylý jelileriniń 77,5%-ǵa eskirgeni eskerilip, bıyl oblysta aýqymdy jóndeý jumystary bastaldy. Petropavl JEO-2-de ınvestısııalyq jáne jóndeý naýqany sheńberinde aksıonerler tarapynan 17,6 mlrd teńgege jumys atqarý josparlanǵan. 2027 jylǵa deıin 739 km elektr jelileri men 240 qosalqy stansa salý úshin jyl saıyn 4 mlrd teńgeden bıýdjet qarajatyn bólý josparlanǵan.
Oblystaǵy jylytý naýqanyna daıyndyqtyń taǵy bir úlken qyry bar. Ol – bolýy múmkin órttiń aldyn alý. О́zderi ot jaǵatyn jekemenshik turǵyn úılerdiń jylytý peshiniń qysqa daıyndyǵy da únemi baqylaýda bolýy kerek. Áıtpese tilsiz jaýdyń óris alýy op-ońaı. Oblystyq TJD bastyǵynyń orynbasary Dmıtrıı Rastıhınniń aıtýyna qaraǵanda, bıyl 240 ret órt shyǵyp, 16 adamnyń ómirin jalmaǵan eken. Keltirilgen shyǵyn 85 mln teńgeden asqan.
«Sol órttiń 74%-y jekemenshik turǵyn úı sektorynyń úlesinde. О́rttiń negizgi sebebi – pesh jasaý men ony qoldanýda jáne elektr quraldaryn ornatý kezinde órt qaýipsizdigin saqtamaý», deıdi ol.
О́rttiń aldyn alý úshin TJD qyzmetkerleri jyl basynan beri 103 myńnan asa turǵyn ómir súretin 49 myńnan astam úıge tekseris júrgizgen. Sonymen qatar órt qaýipsizdigi týraly 71 myń jadynama taratylypty.
Soltústik Qazaqstan oblysy
