Bolashaq sarbazdarǵa arnalǵan qalashyq

«Batyrlar» – Áskerı pat­rıot­tyq jáne izdestirý qoz­ǵa­lysy respýblıkalyq qaýym­dastyǵynyń janynan byl­tyr ashylǵan ortalyq. Mun­daǵy sabaqtarǵa negizinen az qamtylǵan jáne tolyq emes otbasylardan shyqqan, bola­shaq­ta Qarýly Kúshterdiń, qu­qyq­tyq tártip jáne qaýip­sizdik organdarynyń ofıseri bolǵysy keletin joǵary synyp oqýshylary men kolledj stýdentteri qatysady. Bul oraıda «Arystan» arnaıy maqsattaǵy qyzmeti men UQK Shekara qyzmeti birinshi bolyp ózderiniń kadrlyq rezervin qurýǵa qyzyǵýshylyq tanytyp, ortalyqtyń jumysyna belsene aralasyp otyr.

Áskerı patrıottyq jáne izdestirý qozǵalysy respýb­lı­ka­lyq qaýymdastyǵynyń tóraǵasy Amanjol Orazbaev­tyń aıtýyn­sha, byltyr qańtar aıynda bir­neshe zapastaǵy ofıser birigip respýblıkalyq áskerı patrıottyq jáne izdestirý qaýymdastyǵyn qur­ǵan. Al ákimshilik qoǵam­das­tyqtyń bastamasyn qup alyp, burynǵy mekteptiń bos turǵan ǵımaratyn on jylǵa beripti. «Zapastaǵy ofıserler uıymdasa kelip, elimizdegi Qarýly Kúshter men kúshtik qurylymdardyń barlyǵyna hat jazyp, óz qalashyqtaryn ashýǵa usynys hat jiberdik. О́ıtkeni árbir qurylymnyń óz qalashyǵy bolǵany bolashaqta bilikti kadrlardy iriktep alýǵa múmkindik beredi. Máselen, ortalyqqa keletin balalar qazir­den bastap bolashaǵyn áskerı qyzmetpen baılanystyryp otyr. Al olar ózderi arman etken salasynyń qyr-syrymen erterek tanysyp, teorııalyq jáne taktıkalyq daıyndyqty erte bas­tasa, óz isin shyn súıetin otan­shyl ofıserlerdi tárbıeleýge jol ashady», deıdi qaýymdastyq basshysy.

Ortalyqtyń usynysyn alǵash bolyp qup alǵan UQK Shekara qyzmeti kásibı mere­ke­le­ri qar­sańynda oqýlyq ornyna ar­nalǵan qalashyqty ashty. Bul jerde bolashaq shekarashylar jaý shebine tosqaýyl bolý­dyń ádis-tásilderin meń­gerýge múmkindik alady. Eń bastysy, Astananyń mańaıynan shyqpaı-aq shekara shebindegi qyzmetpen tájirıbe júzinde tanysa alady.

«Aldaǵy ýaqytta elimizdegi basqa kúshtik qurylymdar da shekarashylardyń dástúrin úlgi eterine senim mol. Olardyń da qalashyq ashýy úshin jer berýge daıynbyz. Bolashaq jaýyngerler áskerı qyzmetti tek teorııalyq turǵydan emes, tájirıbe júzinde kórýge tıis. Qazirdiń ózinde ortalyqqa Astananyń ár jerinen júzge jýyq bala kelip júr», deıdi A.Orazbaev.

Qaýymdastyq basshysy qazir bala­lardyń ortalyqqa qaty­naýyn jeńildetetin mektep avtobý­sy aýadaı qajet ekenin jetkizdi. Qysy uzaq bolatyndyqtan balalardy qalaǵa deıin jetkizý, olardyń aman-esen úıine oralǵany ýaıymǵa aınalatyn kezderi kóp bolady. Sebebi ortalyqqa keletin balalardyń arasynda Qosshyda turatyndary da bar.

«Olar aptasyna keminde úsh ret – saǵat úshten keshki jetige deıin jattyǵýdan ótedi. Bizdiń nusqaýshylar – kúsh­tik qurylymdarda qyz­met etetin áskerı adamdar. Mysaly, «Arystan» arnaıy qyzmetimen memo­randýmǵa otyrdyq. Qazir aı saıyn arnaýly qyzmettiń jigitteri balalarmen jattyǵý ótkizedi. Atý, taktıkalyq, saptyq daıyndyq jáne kólik júrgizý sabaqtary ata-babalarymyzdyń qahar­mandyq tarıhyn zertteýmen, sondaı-aq qoıan-qoltyq, taktı­kalyq medısına jáne jaýyn­gerlik drondardy qol­daný sekildi áskerı ómir­ge qajet kúndelikti sabaq­tar­dy ótkizedi. Elı­talyq ar­naıy jasaqtyń tájirı­beli jaýyngerleri tárbıe­le­ný­shilerimen qýana aınalysyp, jasóspirimder aldyn­da úlken qyzyǵýshylyq ta­ny­­­typ keledi», deıdi ol. Aıt­­paqshy, bıyl qaladaǵy qoǵamdyq kólikterdiń birinde jolaý­shy­lardyń birine orta­lyqtyń tár­bıelenýshileri alǵashqy medı­sınalyq kómek kórsetip, ajaldan aman alyp qal­ǵanyn da aıta ketken jón. Adam ómirine arasha bolǵan jasóspirimder sol kezde ortalyqta úırengen tak­­tıkalyq medısınanyń qajet­­ke jaraǵanyn jetkizdi. Solardyń biri – Aıdına Nurǵalı.

Onyń aıtýynsha, ortalyq týraly ol dostarynan estip-bilgen. Otbasynda ómirin áskerı qyzmetpen baılanystyrǵan eshkim joq. Alaıda qazirdiń ózin­de taýdaı talaby bar Aıdına bolashaq mamandyǵyn tańdap ta qoıǵan. «El tynyshtyǵy jolynda qyz­met etý – armanym. Sol úshin osy ortalyqqa kelip júrmin. Bul jerde júrip ás­kerı saptyq júrýdi úı­ren­dim. Polıgondarǵa shy­ǵyp júrmiz. Mysaly, 7 ret polıgonǵa shyq­tyq. «Aıbyn-2024» áskerı jarysyna qatysyp keldim. Kólik júrgizýdiń teorııalyq bilimderin meńgerip jatyrmyn. Osyndaı teorııalyq jáne tájirıbelik daıarlyqtardan ótý oqý bitir­gen soń áskerı aka­demııaǵa túskende kóp kómegin tıgizedi dep senemin», deıdi A.Nurǵalı.

Jalpy, áskerı-patrıottyq ortalyǵynyń esigi kez kelgen balaǵa aıqara ashyq ári beretin tálim-tárbıesi úshin aqy suramaıdy. Eń bastysy, sarbaz bolyp sapqa turǵysy keletin jasóspirimderdiń jaýynger bolýǵa degen yqylasy ǵana qajet. Al ortalyq olar­dyń áskerı ómirge degen qul­shynysyn arttyryp, durys tańdaý jasaýyna erte bastan kómektesedi eken. Kez kelgen memleket shekaradan bastalady. Olaı bolsa oqý qala­shyǵy óskeleń urpaqtyń boıynda birinshi kezekte elimiz úshin maqtanysh sezimin, azamattyǵy men patrıotızmin, jo­ǵary jaýap­ker­shiligin da­my­týǵa jumys iste­rine senim mol.

Qalashyqtyń ashylýyna oraı uıym­dastyrylǵan is-sha­rada ortalyqtyń tárbıe­le­ný­shi­leri taktıkalyq daıyn­dyǵy men jaýyngerlik daǵdy­laryn kórsetti. Sondaı-aq uıym­­das­ty­rýshylar kelýshilerge el sheka­ralarynyń qaýipsizdigin qam­tamasyz etý úshin paıdalanylatyn UQK Shekara qyzmetiniń zamanaýı qarý-jaraqtary men áskerı tehnıkasynyń kórmesin usyndy. Budan keıin Shekara qyzmeti ansambli solısteri ánnen shashý shashyp, kelýshiler áskerılerdiń ashanasynda qonaq bolyp, sarbaz botqasynyń dámin tatty.