Qoǵam • 20 Tamyz, 2024

Dombyra-dýman

100 ret

kórsetildi

2 mın

oqý úshin

Abaı kúni jyl ótken saıyn jańǵyryp, jańa sıpatta toılanyp keledi. Ásirese bul merekeniń jastar arasynda mańyzy arta tústi. Sonyń bir dáleli – elordada ótken «Dombyra party» atty ádebı-sazdy kesh. Onda hakimniń ánderi shyrqalyp, óleńderi oqyldy. Jobanyń kóńil súıiner ereksheligi, aqyn shyǵarmashylyǵyna qatysty chellendj 10 tamyzdan bastap ár apta saıyn jalǵasyp otyrady. Astana qalasy Tilderdi damytý jáne arhıv isi basqarmasy jáne Saryarqa aýdany ákimdiginiń yjdaǵatymen jasalǵan bul is-shara erke Esildiń jaǵasynda, ashyq aspan astynda uıymdastyryldy.

Abzal MAQASh

О́z kezeginde basqarma basshysy Sáken Esirkep merekeniń aýqymy keńeıe beretinin aıtyp, qatysýshylarǵa alǵysyn bildirdi. «Abaı kúni – alty Alashtyń rýhanı merekesi. Ol birneshe kúnge jalǵasyp, halyq arasynda nasıhattalyp jatsa, eldigimizdiń aıǵaǵy. Al búgingi dombyra dýmanynyń basty qatysýshylary – jastar. Olardyń qaırat-qýaty, jasampaz oıy merekege jalpyhalyqtyq sıpat beretini daýsyz. Sondyqtan rýhanı tamyrdan ajyramaǵan óskeleń urpaqqa bizdiń tarapymyzdan árdaıym qoldaý kórsetiledi», dedi ol.

Sahnada Qazaq ulttyq óner ýnıversıtetiniń stýdentteri, Ulytaý, Mańǵystaý, Abaı týǵan Semeı topyraǵynan kelgen qala qonaqtary án aıtyp, óleń oqydy. Kesh barysynda jańbyr jaýyp ketse de, halyq miz baqqan joq. Kerisinshe, Abaı rýhymen tynystap, Astananyń aspanyn odan saıyn araılandyrdy.

«Hakim rýhy arqyly kópten beri úzilip qalǵan «Dombyra party» jandandy. Halyq óte jyly qabyldady. Kórermender arasynan áýesqoı dombyrashylar shyǵyp, sahnada óz ónerin kórsetti. Eń bastysy, Abaı atamyzdyń shyǵarmalary jastar únimen jańǵyrdy», deıdi kesh júrgizýshisi Almas Altaı.

Aıta keteıik, kelesi dombyra-dýman 24 tamyz kúni ótedi.