«2024 jyldyń alǵashqy alty aıynda bizdiń aýdanda jalpy quny 4 034,8 mln teńgeniń aýyl sharýashylyǵy ónimi óndirildi» deıdi aýdan ákimi Alpamys Kóshkinbaev. Onyń áńgimesinen Jańaqala aýdanynda memlekettik baǵdarlamalar arqyly 2024 jyly iske asyp jatqan jobalar jáne aldaǵy josparlar týraly tolyǵyraq málimet bildik. Kúni búgin aýdanda 518 sharýa qojalyǵy, 42 JShS bar eken. Al resmı tirkelgen 15 aýylsharýashylyq óndiristik kooperatıviniń 8-i naqty jumys istep tur.
«Aýdanda 93 sharýa qojalyǵy asyl tuqymdy mal ósirýmen aınalysady. Onyń ishinde 86 qojalyq – iri qara, 15 qojalyq – qoı, 5 qojalyq jylqy ósiredi. Qazir bizdegi asyl tuqymdy sıyr malynyń úlesi – 24,5% (20 265 bas), qoı – 12,5% (16 635 bas), al jylqy 4,2% (1 438 bas) boldy», deıdi Alpamys Jańabaıuly.
О́ńirdegi osyndaı oń ózgeris tórt túliktiń babyn tapqan sharýalardyń tynymsyz eńbegi desek, memlekettiń de aýylǵa arnalǵan járdemi az emes. 2024 jyldyń 6 aıynda ǵana osy Jańaqala aýdanyndaǵy sharýa qojalyqtaryna 511,3 mln teńge sýbsıdııa tólengen. Sonyń ishinde mal sharýashylyǵy salasynda tólengen sýbsıdııa kólemi 454,3 mln teńge bolypty. Aýyl sharýashylyǵy tehnıkasyn satyp alý boıynsha 57,0 mln teńge sýbsıdııa berilgen. Aýdan basshysy bıylǵy 6 aıda aýdanda 22 traktor, 31 aýyl sharýashylyǵy tehnıkasy jańadan satyp alynǵanyn aıtady. Buǵan qosa «KazAgroQarjy» AQ jelisimen 140,4 mln teńge jeńildetilgen nesıe berilgen.
Aýyl sharýashylyǵy salasynda tartylǵan ınvestısııa kólemi 6 aı ishinde 267,4 mln teńgege jetken.
Aýyl-aımaqty damytý úshin shaǵyn sharýashylyqtardy qoldaýǵa arnalǵan «Aýyl amanaty» baǵdarlamasy aıasynda 2023 jyly Jańaqala aýdanynda sharýalardan 87 ótinim túsken eken. Sonyń ishinde 46 joba maquldanyp, 290,8 mln teńge qarajat aýdarylyp, júzege asypty. Bul baǵdarlama bıyl da jalǵasyn tapty. 2024 jyly «Aqjaıyq» aýylsharýashylyq óndiristik kooperatıvi AQ basqarmasyna jańaqalalyqtardan 39 joba tústi. Bul jobalardyń jalpy quny 320,7 mln teńge edi. Sonyń ishinde 7 joba – sútti sıyr ákelý, 4 joba – iri qara bordaqylaý, 10 joba – qoı-eshki alý, 3 joba qus ósirý bolypty. Odan bólek, eginshilik, kólik jýý beketi, mal soıý sehy, óńdeý kásiporyndary sekildi aralas jobalar da bar. Qazir atalǵan 39 jobanyń 30-y qanaǵattandyrylǵan.
«Sonymen qatar 3 aýyl sharýashylyǵy óndiristik kooperatıvine 70,5 mln teńge mólsherinde nesıe berý jónindegi jobalarymyzdy «Aqjaiyq» AShО́K AQ basqarmasy talqylap jatyr. Eki joba qazirdiń ózinde qanaǵatandyryldy», deıdi aýdan ákimi.
Memleket basshysy Joldaýynda otandyq kásipkerlikti qoldaý jáne básekelestikti damytý boıynsha atqarýshy organdardyń aldyna birqatar naqty mindet qoıǵan edi. 2025 jylǵa qaraı ishki jalpy ónimdegi shaǵyn jáne orta kásipkerlik úlesin 35%-ǵa deıin ulǵaıtý tapsyrylǵan. Osy baǵytta memleket qabyldaǵan sheshimderge sáıkes shaǵyn jáne orta bıznes turaqty damyp keledi. Dál qazir Jańaqala aýdanynda 1 736 shaǵyn jáne orta kásipkerlik nysany jumysyn júrgizip tur. Bul salada 2 166 adam eńbek etip, nápaqasyn aıyryp júr.
«Bıyl kásipkerlik salasynda 390 mln teńgege 8 joba júzege asty. Onyń ishinde 2 azyq-túlik dúkeni, 2 sýpermarket, 1 mınımarket, 1 dámhana, 1 avtokeshen jáne 1 tehnıkalyq qyzmet kórsetý stansasy paıdalanýǵa berildi. Jyl sońyna deıin barlyǵy 430,0 mln teńgege 10 ınvestısııalyq jobany júzege asyramyz dep josparlap otyrmyz», deıdi Alpamys Kóshkinbaev.
«Bıyl aýdanda turǵyn úı kezeginde turǵan azamattardy turǵyn úımen qamtý úshin «Samuryq-Qazyna» arqyly 50 úıge – 774,8 mln teńge, BQO qurylys basqarmasy arqyly 5 úıge 89,1 mln teńge qarjy bólindi. Buǵan qosymsha bıyl 12 úıge bıýdjettik ótinim joldadyq», deıdi A.Kóshkinbaev.
Batys Qazaqstan oblysy
