Sýretti túsirgen – Erlan OMAR, «EQ»
Tarıhı-mádenı jáne týrıstik nysandardyń ekologııalyq jaı-kúıi, kórikti oryndardy abattandyrý, kıeli oryndardyń kútimine qatysty qolǵa alynǵan ıgi bastama 15 tamyzdan 15 qyrkúıekke deıin jalǵasyn tappaq. Qoǵamdyq eko-baqylaý respýblıkalyq aksııasynyń aıasynda apta saıyn birneshe taqyryp qamtylmaq. Aldymen týrıstik jáne tarıhı-mádenı nysandardyń eko-monıtorıng aptalyǵy bastalyp, 22 tamyzǵa deıin jalǵasady. Odan keıin 23–30 tamyz aralyǵynda abattandyrý, onyń ishinde jasyl jelekterdi kútý jáne sýarý salasyndaǵy eko-monıtorıng aptalyǵy ótedi. Stıhııalyq polıgondardy aralaý sharasy 31 tamyz – 7 qyrkúıek aralyǵynda uıymdastyrylmaq. 8–15 qyrkúıek aralyǵynda jer qoınaýyn paıdalaný nysandaryna baqylaý júrgizý aptalyǵy uıymdastyrylmaq.
Jobanyń maqsaty – halyqty tabıǵatty qorǵaýǵa jáne oǵan uqypty qaraýǵa tartý, kúrdeli máselelerdiń túıinin tarqatýda azamattyq qoǵamnyń belsendi múshelerin tarta otyryp sheshýge kúsh salý. Joba tarıhı-mádenı jáne týrıstik obektilerdi saqtaý isinde qorshaǵan ortaǵa uqypty qaraý jáne áleýmettik jaýapkershilik mádenıetin qalyptastyrýda mańyzdy qadam sanalmaq. Bir aı boıy ótetin aksııaǵa qoǵamdyq keńes músheleri, «Qazaqstannyń Azamattyq Alıansy» ZTB, «Qazaqstannyń ekologııalyq uıymdary qaýymdastyǵy» ZTB, «Qazaqstandyq qoǵamdyq keńester qaýymdastyǵy» RQB, «Qazaqstannyń ekologııalyq qory» QQ, «Áleýmettik bastamalar qory» QQ ókilderi syndy 600-den asa ÚEU, eko-blogerler, eko-eriktiler, azamattyq sektor, BAQ ókilderi qatyspaq.
Uıymdastyrýshylar aksııa aıasynda respýblıka boıynsha barlyǵy 1,5 myńnan asa adamnyń qatysýymen 300 monıtorıngtik is-shara ótkizý josparlanǵanyn jetkizdi.
15 tamyzda Astana qalasynyń mańyndaǵy «Bozoq» murajaı-qoryǵynda, Almaty oblysynyń kórikti mekeni «Kólsaı kólderi» ulttyq parkinde, Túrkistan oblysynyń «Áziret Sultan» murajaı-qoryǵynda qoǵamdyq monıtorıng júrgizý sheńberinde aılyq aksııa bastaý aldy.
Elorda irgesinde ótken aksııaǵa «Qazaqstandyq qoǵamdyq keńester qaýymdastyǵy» RQB basshysy Sálimbaı Shúneev, Astana qalasy qoǵamdyq keńesiniń tóraǵasy Zulpyhar Ǵaıypov, «Qazaqstannyń ekologııalyq uıymdary qaýymdastyǵy» ZTB joba menedjeri Sabına Sábıtova, «Qazaqstannyń ekologııalyq qory» QQ jobalarynyń úılestirýshisi Nazerke Oralbekova qatysty.
«Mundaı tarıhı-mádenı oryndardyń basynda qurylys jumystaryn júrgizgende tabıǵatty búldirmeýge, qorshaǵan ortanyń florasy men faýnasyn saqtaýǵa barynsha kúsh salýymyz kerek. «Bozoq» memlekettik tarıhı-mádenı murajaı-qoryǵyn qalpyna keltirip, abattandyrý jumysy bastalǵan eken. Tarıhı oryn, babalarymyzdyń tek kóshpeli halyq bolmaǵanyn, órkenıettiń týyn kóterip qala salǵanyn áıgileıtin kıeli mekenniń biri – osy jer. Osyndaı tarıhı oryndardy qalpyna keltirip, óskeleń urpaqqa nasıhattaýymyz kerek. Keıde qurylys júrip, jóndeý jasalǵanda tabıǵatqa zııan keltirý deregi de tirkeledi. Osyndaı keleńsizdiktiń aldyn alý maqsatynda qurylǵan qoǵamdyq komıssııa monıtorıng júrgizedi», dedi Z.Ǵaıypov.
Sonymen qatar ol murajaı-qoryqtyń aýmaǵy qorshalyp, kútimge alynǵaly aýyp ketken jabaıy ań-qus qaıta jersinip, tabıǵat túleı bastaǵanyn da jetkizdi.
«Kólsaı kólderi» memlekettik ulttyq tabıǵı parkinde Qonaev qalasynyń qoǵamdyq keńes tóraǵasy Sergeı Gorıanoı aksııaǵa qatyssa, Túrkistan oblysyndaǵy «Áziret Sultan» memlekettik tarıhı-mádenı murajaı-qoryǵynda oblystyq qoǵamdyq keńes músheleri Baqytjan Beısembaev, Zýpparhan Chaldanov, Inara Namazbaeva bastaǵan top tarıhı-mádenı eskertkishterdiń saqtalýyna, týrıstik oryndardyń tazalyǵyna baqylaý júrgizdi.
