Qos dıplomdy shyǵystanýshy
Qazir eki nemese úsh joǵary oqý ornyn bitirip, dıplom alý onsha tańsyq emes. Al sonaý XVIII ǵasyrda búgingideı samsaǵan oqý ordasy joq qazaq dalasynan, 1890 jyly Reseıdegi Tomsk ýnıversıtetiniń medısına fakýltetine oqýǵa túsip, bir jyldan keıin ımperatorlyq Sankt-Peterbýrg ýnıversıtetiniń shyǵystaný fakýltetine aýysyp, ony 1895 jyly bitirgennen keıin 1897 jyly atalǵan oqý ornynyń zań fakýltetin támamdap, eki joǵary bilim alǵan tuńǵysh qazaq – Dinmuhamed Sultanǵazın. Arab, parsy, túrik, tatar, orys, fransýz tilderin erkin meńgergen bilimdi azamat «Dala ýalaıatynyń gazeti» basylymynda redaktor jáne aýdarmashy bolyp qyzmet istegen. 1910 jyldan ómiriniń sońyna deıin Bakýde dinı ortalyqta shyǵys tilderinen sabaq bergen.
Alǵashqy saıahatshy
Biz Álibı Jangeldındi revolıýsıoner retinde bilemiz. Al onyń qazaqtan shyqqan alǵashqy jıhankez ekeninen habarymyz az.
Ol ótken ǵasyrdyń basynda «Nıkolaı Stepanov» degen búrkenshik esimmen Eýropa, Taıaý Shyǵys, Afrıka jáne Azııa elderine jaıaý saıahat jasaǵan. Onyń bul saıahaty tórt jyldan asa ýaqytqa sozylady. Ol teńiz jáne temirjoldy eseptemegende, fotoapparatyn arqalap, 12 myń shaqyrym jaıaý júrgen. Máselen, jaıaý-jalpylap Polsha, Serbııa, Bolgarııa, Túrkııa, Sırııa, Palestına, Afrıka, Mysyr jáne Abıssınııany basyp ótip, keri oralǵan jolynda Arab túbegi, Messopatamııa, Persııa, Úndistan, Seılon, Malaı araldary, Ońtústik Qytaıda bolyp, Formoza araly arqyly 1912 jyly Japonııaǵa jetken. Sondaı-aq kúndiz júrgen jerlerin sýretke túsirip, túnde ony shyǵaryp otyrǵan.
Tuńǵysh dıplomat áıel
Ol kim deseńiz, zamanynda Qazaq KSR-niń Áleýmettik qorǵaý mınıstri, Qazaq KSR Mınıstrler keńesi tóraǵasynyń orynbasary, odan keıin qazaq áıelderi arasynan alǵashqy Syrtqy ister mınıstri bolǵan – Baljan Bóltirikova.
Bilikti dıplomat BUU Bas Assambleıasynyń XXI jáne XXV sessııalaryna Keńes odaǵynyń resmı delegasııasyn bastap baryp, el atynan BUU minberinde sóz sóılegen. Ásirese onyń AQSh-tyń BUU janyndaǵy Adam quqyqtary jónindegi odaq quryp, óz saıasatyn júzege asyrmaq bolǵan tustaǵy bul ıdeıanyń odaq múddesine qaıshy ekenin dáleldegen erligine álem dıplomattary tánti bolǵan.
