Memleket basshysynyń tapsyrmasymen Úkimet elimizdiń jylý ortalyqtaryn jańǵyrtý boıynsha naqty is-sharalardy atqaryp keledi. Mysaly, Premer-mınıstr Oljas Bektenov Kentaý, Rıdder jáne Qyzylorda qalalaryndaǵy jylý kózderine rekonstrýksııa jáne kúrdeli jóndeý júrgizý úshin Úkimet rezervinen qarajat bólý týraly qaýlylarǵa qol qoıdy. Bul oraıda Túrkistan oblysy Kentaý qalasyndaǵy «№5 Jylýenergo ortalyǵynyń» № 7, 8, 9, 10, 11, 12 qazandyqtaryn rekonstrýksııalaýǵa 9 mlrd teńgeden astam qarjy qaraldy. Kentaýda 1934 jyly salynǵan jylý energoortalyqtyń qyzmetin 14 myńnan astam abonent tutynady. Onyń ishinde 347 kópqabatty, 2 000-nan astam jeke sektordaǵy turǵyn úı jáne 106 bıýdjettik mekeme men 441 kommersııalyq nysan bar. Jalpy, atalǵan jylý ortalyǵy jabdyqtarynyń 85 paıyzy tozǵan. Sonyń saldarynan ótken jylǵy qysqy maýsymda kentaýlyqtar tońyp shyqty. Sapaly jylýdy tutyna almady. Osy keleńsizdikterdiń bıylǵy maýsymda qaıtalanbaýy úshin búginde Kentaýdaǵy «№5 Jylýenergo ortalyǵyn» qaıta qurý jumystary qarqyndy júrip jatyr.
Jýyrda ortalyqta atqarylyp jatqan jumys barysyn baqylaǵan oblys ákimi Darhan Satybaldy jaýaptylarmen shtab keńesin ótkizip, tıisti tapsyrmalar berdi. Jylý ortalyǵynyń qazirgi jaı-kúıi men atqarylǵan jumystar týraly baıandaǵan «Em-Holdıng» JShS ókiliniń málimdeýinshe, qazandyqtardy rekonstrýksııalaý jumystary bekitilgen kestege saı, úzdiksiz júrgizilip keledi. Nysanda eki aýysymda 180 adam jumys istep jatyr. Eki qazandyqta jylý-mehanıkalyq bólik boıynsha jumystar 99 paıyzǵa aıaqtalǵan. Sonymen qatar 6 qazandyqqa arnalǵan tútin qubyry daıyndalý ústinde. Jospar boıynsha №8, №11 qazandyqtardaǵy jumystar tamyz aıynyń sońynda, №9, №10 qazandyqtar qyrkúıektiń ekinshi onkúndiginde, al №7, №12 qazandyqtardyń qurylysy qarasha aıynyń sońynda aıaqtalmaq. Budan bólek, №5 jáne №6 qazandyqtarda aǵymdaǵy jóndeý jumystary júrgizilip jatyr.
Oblysta jylý berý maýsymyna daıyndyq tańdaı keptirer ystyǵy qaıtpaǵan shildede bastalǵan bolatyn. Jaýapty basshylardy jınaǵan oblys ákimi jylytý maýsymynda óńirde kómirden eshqandaı problema bolmaýyn, mektepter, aýrýhanalar jáne ózge de bıýdjettik mekemelerdiń kómirmen qamtylýyn qadaǵalaýdy tapsyrdy. Bul oraıda tasymaldaýshy kompanııalarmen kelisim jedeldetilip, 1 qyrkúıekke deıin bilim uıalary kómirmen qamtylýy qajet. Oblystyq energetıka jáne turǵyn úı-kommýnaldyq sharýashylyq basqarmasy basshysynyń orynbasary Janádil Aıtbekovtiń aıtýynsha, kómir boıynsha óńirdiń jalpy qajettiligi – 778 myń tonna. Onyń ishinde bıýdjettik mekemelerge qajettilik – 104,5 myń tonna bolsa, jylý beretin kásiporyndarǵa – 4,8 myń tonna, jeke turǵyndarǵa – 386,1 myń tonna, jylyjaılarǵa 282,9 myń tonna kómir qajet. Mamyr men shilde aralyǵynda 88,2 myń tonna kómir jetkizilgen. Oblysta eldi mekenderdi gazben qamtý, bıýdjettik mekemelerdi, bilim uıalarynyń qazandyqtaryn gaz júıesine aýystyrý jumystary da qarqyndy. Sonyń nátıjesinde bıyl turǵyndardyń kómirdi tutyný kólemi 82 myń tonnaǵa, bıýdjettik mekemelerdiń tutyný kólemi 36 myń tonnaǵa tómendegen.
Oblystyq energetıka jáne turǵyn úı-kommýnaldyq sharýashylyq basqarmasynyń málimetine júginsek, óńirde jylýmen qamtamasyz etý boıynsha 7 kásiporyn qyzmet kórsetedi. Olardyń quramynda 1 jylý energetıka kesheni, 34 ortalyqtandyrylǵan jáne 1 577 avtonomdy qazandyq bar. Atalǵan jylý ortalyqtary arqyly oblysta 1 279 bilim, 668 densaýlyq saqtaý, 212 mádenıet, 9 jumyspen qamtý, 75 sport nysany jáne 737 kópqabatty turǵyn úı jylýmen qamtamasyz etiledi.
Jylý energetıkalyq keshenderine qajetti otyn kólemi anyqtalǵan. Aldaǵy jylytý maýsymyna 114,2 myń tonna kómir, 1 mln lıtr dızel, 7,8 myń tonna mazýt, 17 093 myń tekshe metr gaz qajet. Jalpy, jylytý maýsymynda tutynylatyn mazýt kólemi – 7,8 myń tonna. Aldaǵy jylytý maýsymyna 17,3 mlrd teńge qaralyp otyr. Onyń ishinde 16,9 mlrd teńge bıýdjet esebinen bólingen. Sondaı-aq ótken maýsymda 93 bıýdjettik mekeme kómirden gazǵa aýystyryldy.
Túrkistan oblysy
