Syrym aýdanyndaǵy qonystoı

Tamyzdyń 21-i kúni Jym­pıty jerinde «Qa­zaq­stan halqyna» qo­ǵamdyq qorynyń qarjysyna salynǵan 100 úıdiń kilti baspana ıelerine saltanatty túrde tabys etildi. Osy­dan az ǵana kún buryn 14 úı berilgen edi. Osylaısha, Syrym aýdanynda barlyǵy 114 úı salyndy. Atap aıtsaq, О́leńti aýylynda – 40, Jympıtyda – 48, Buldyrty aýylynda – 25 jáne Kózdiqara aýylynda 1 úı paıdalanýǵa berildi. Bul bıylǵy sý tasqynynda tabıǵı apat sebebinen adam turýǵa jaramsyz dep tanylǵan baspanalar bolatyn.

Zardap shegýshilerdi ja­ryl­qaǵan qorǵa rıza bolǵan tur­ǵyndar Jympıty aýylynda paıda bolǵan shaǵyn aýdandy «Qazaqstan halqyna» dep ataýdy uıǵarypty.

Saltanatty is-sharaǵa Batys Q­a­zaqstan oblysynyń ákimi Na­rıman Tóreǵalıev pen «Qazaq­stan halqyna» qorynyń tóraǵasy Bolat Jámishev kelip, jańa qonys ıelerin quttyqtady.

«Prezıdent tapsyrmasymen qurylǵan «Qazaqstan halqyna» qory qıyn-qystaý kezeńde otandastarymyzǵa qol ushyn berdi. Bıyl elimizdiń birneshe óńiri alapat sý tasqynynan zar­dap shekti. Sol kezde bizdiń qor elimizdiń 5 óńirinde 20 eldi me­kende 627 turǵyn úı salýǵa atsalysty. Búgin mine, Syrym aýda­nynda salynǵan jańa úıler­diń kilti tabys etildi. Bizdiń me­senat­tarymyzdyń, Batys Qa­zaq­stan oblysy ákimdiginiń, qury­lysshylar men «Qazaqstan hal­qyna» qorynyń birlesken jumysynyń arqasynda Syrym aýdanynda 114 jańa úı salyndy», deıdi qoǵamdyq qor tóraǵasy Bolat Jámishev.

О́ńirdegi tótenshe jaǵdaıdyń zardabyn joıýǵa qoldaý kórset­keni úshin oblys ákimi Narıman Tóreǵalıev «Qazaqstan halqyna» qoryna alǵys aıtty.

«Memleket basshysy sý tas­qynynan zardap shekken azamattardy barlyq qajettilikpen qamtamasyz etýdi tapsyrǵan edi. Osyǵan oraı biz tabıǵı apatqa ushyraǵan oblys turǵyndarynyń tıisti aqshalaı ótemaqysyn ýaq­tyly berip, baspanamen tolyq qamtý úshin qoldan kelgenniń bárin jasaımyz. Buǵan mesenattar men úkimettik emes uıymdar úlken qoldaý kórsetip jatyr. Búgin erekshe kómegi úshin «Qazaqstan halqyna» qoǵamdyq qoryna alǵys aıtamyn», dedi N.Tóreǵalıev.

Qurylys alańdaryndaǵy qar­balas jumys atalǵan qor men BQO ákimdigi arasynda memo­randýmǵa qol qoıylǵannan keıin bastalǵan edi. Ákimdik sý basý qaýpi joq aýmaqtan jańa úı salý úshin jer telimderin anyqtap, bóldi. Sondaı-aq qajetti ınje­ner­lik ınfraqurylymdy júr­gizdi. Jaz boıy jergilikti qoǵam belsendileri qurylys jumy­sy­nyń barysy men sapasyn baqylap, qadaǵalap otyrdy. Endi mine, 80 sharshymetrlik jańa úıler halyqtyń ıgiligine berilip otyr.

Batys Qazaqstan oblysy