Petropavlda kólik júrmeıtin, tek qalalyqtar jaıaý júrip tynystaıtyn «Qazaqstan Konstıtýsııasy» (burynǵy Lenın) atty úlken jáne eń eski ortalyq kóshe bar. Qalalyqtardyń erekshe maqtan tutatyny da osy kóshe. Mine, osy kósheniń boıynda «Biz kir-qoqysqa jol bermeımiz!» atty ekologııalyq is-shara ótti. Is-sharaǵa qatysqan belsendiler, jalyndaǵan jastar qala turǵyndaryn qaǵaz paketterin polıetılen paketterge aıyrbastaýdy usyndy. Sóıtip, respýblıkanyń ekologııalyq máselelerdi sheshýge atsalysýǵa shaqyrdy.
Osy kúni plastık qaptamalarmen tonnalaǵan qoqys polıgondarǵa shyǵaryldy. Álemniń túkpir-túkpirinde ekologter osyndaı qoqystardy óńdeýdi usynyp otyr. О́ıtkeni qazir polıetılen paketterden aıaq alyp júrgisiz, ol bizdiń turmysymyzǵa ábden dendep endi. Volonterlerdiń front ofısiniń basshysy Anastasııa Volkova osy paketterdiń jerde qalsa júzdegen jyl boıy buzylyp, ekologııaǵa keri áser etetinin aıtty. «Olardyń qorshaǵan ortaǵa tıgizetin zııany orasan. Jelmen ushqan polıetılen paketter aǵys kanaldaryn biteıdi, barlyq sý jolyn jabady. Qoqys baktarynan ushyp, túrli mıkrob taratyp, turǵyndardyń balalar oınaıtyn aýlasynda jatady. Jastar osyndaı problemalardy tereń túsinip, aýlalardyń barynsha taza bolýyna belsendi atsalysýlary kerek», dedi ol.
Jastardyń usynystaryn eresekter de qoldaıtyndaryn bildirip, polıetılendi paketterdiń jelmen jarysyp, shashylmaýyn jappaı tyıý kerektigin aıtyp jatty.
Ekologııalyq aksııaǵa qatysqandar negizgi kósheni tazalaýmen qatar Jambyl kóshesiniń boıyndaǵy ıadrolyq jarylystar qurbandaryna arnalyp qoıylǵan eskertkish tastyń aınalasyndaǵy skverdi de qoqystan tazartty. Bul jumys qalanyń shaǵyn aýdandarynda da jalǵasyn tapty. Ásirese kóktemdegi tasqyn sýynan zardap shekken shaǵyn aýdandar qoqystan tazalanyp qaldy.
Jastar molynan qatysqan soń aksııa oınap-kúlip kóńildi júrýmen erekshelendi. Aksııaǵa qatysýshy jastar birneshe saǵattyń ishinde qap-qap qoqys jınap, olardy júk mashınalarymen jóneltip jatty. «Prezıdenttiń bastamasymen qolǵa alynǵan bul is-shara halyqqa óte paıdaly. Biz qazir osy is-sharaǵa qatysýdy dástúrge aınaldyryp kelemiz. Bizdiń úlgimizben qalanyń kóptegen jastary óz erkimen kómekke keledi. Qorshaǵan ortamyzdyń taza bolýyn biz árqashan nasıhattap otyramyz. Úlkender men jastar bizdiń isimizdi qoldaıtyndaryn bildirip otyrady», dedi belsendi volonterlerdiń biri Ásel Dosanova.
Aıta ketetin jaıt, tazalyq aksııasy qolǵa alynǵaly beri oǵan 142 myńdaı soltústikqazaqstandyq qatysyp, 211 skverler men parkter, kósheler qoqystan tazalandy. Barlyǵy 141 myń tonna qoqys shyǵaryldy, 32 myń túp aǵash otyrǵyzyldy.
PETROPAVL
