Asyltuqymdy qoı ósirýshi shopandar men iri sharýa qojalyqtary qatysqan sharanyń ashylýynda qala ákimi Gúljan Qurmanbekova kórmeniń mańyzdylyǵyna toqtaldy. Igi isti uıymdastyrýshylar men mal basyn asyldandyrý baǵytynda eńbek etip jatqan sharýalarǵa sáttilik tilep, rızashylyǵyn bildirdi. Kópshilik quıryqty qylshyq júndi, qısary jáne arashan qoı tuqymdaryn kórdi kórmeden. Qısary qoılarynyń alqymy keń, arqasy tegis, sıraǵy jýan bolsa, dóń tumsyqtary, qylshyq júni bólekshe reń beredi. Kórme-saıystyń erejesi boıynsha qazylar alqasy qoshqarlardyń salmaǵy men boıyna jáne syrtqy bitimine qaraı baǵalady. Sonymen toqty qoshqar boıynsha Berik Sultannyń salmaǵy 144 kılolyq «Músin» qoshqary dara shyqty. Boıy 105,5 santımetr arystyq Aqylbek Áljannyń «Gektar» atty qoshqary bıiktik boıynsha chempıon atandy. Al Baqbergen Áljanovtyń «Kýba» atty qoshqary syrtqy bitimi boıynsha úzdik boldy. Shymkentten kelgen Baqtııar Balajannyń «Turan» atty saqa qoshqary 195 kılo basyp, jeńimpaz dep tanyldy. Qazylar alqasynyń sheshimimen salmaǵy, boıy jáne turqy eskerilip, úzdik qoshqar ıelerine Alǵyshattar men arnaıy chempıondyq belbeý jáne kýbokter tabystaldy.
Tulpar baptap báıgege qosatyn atbegiler týraly ár qazaq biledi. Qusbegilerdiń búrkit, suńqar, qarshyǵa syndy jyrtqysh qustardy qolǵa úıretip, ańǵa salatyny da málim. Al endi tuqymy sırek kezdesetin qoshqar baptaıtyndardy qalaı ataımyz? Uıymdastyrýshylar men is-sharany júrgizýshiler asyl tuqymdy qoshqardy baptap, kórmege ákelgenderdi qoıbegi dep atap jatty. Qoı baǵatyndardy qoıshy nemese shopan deıtin, al qoıbegi deý qanshalyqty durys?
Túrkistan oblysy
