Internet platformalarda eńbek etetin azamattar da áleýmettik qoldaý sharalarynan qur qalmaýǵa tıis. Búginde Memleket basshysynyń tapsyrmasyn oryndaý úshin Áleýmettik kodekske, Salyq kodeksine jáne Mindetti áleýmettik medısınalyq saqtandyrýǵa birqatar túzetý engizilipti. Internet platformada jumys isteý degenniń ózin kópshilik tabys tabýdyń taǵy bir múmkindigi retinde qaraıdy. Ári osy múmkindikti paıdalanatyndar jyl saıyn kóbeıip keledi. Sarapshylardyń pikirinshe, elde qazirdiń ózinde 500 myńdaı azamat osy salada eńbektenip, tabys taýyp júr. Dál qazir platformalardyń ishinde keń taraǵany kýrerlik jumys, taksı júrgizýshileriniń qyzmeti bolyp tur.
Eńbek jáne halyqty áleýmettik qorǵaý birinshi vıse-mınıstri Aqmádı Sarbasov platformada jumys isteýdiń artyqshylyǵy jumys kestesiniń erkindiginde ekenin aıtty.
– Platformadaǵy jumysty negizgi jumyspen qatar alyp júrýge boldy. Árıne, mundaı jumystyń táýekelderi de joq emes. Bul birinshi kezekte tabystyń turaqty bolmaýymen, kóleńkeli qatynastardyń kóbeıýimen baılanysty. Jumysshylardyń memleket usynǵan kepildikterden qaǵylýy da ońaı sharýa emes. Sebebi bul azamattyń medısısınalyq qyzmet alýyna, áleýmettik ahýalyna áser etýi múmkin. Memleket basshysy sıfrlyq ekonomıkaǵa aralasatyn el azamattarynyń quqyn qorǵaýdyń sharttary men tetikterin ázirleýdi tapsyrdy. Eńbek jáne halyqty áleýmettik qorǵaý mınıstrligi tarapynan birqatar is-shara qabyldandy. Shildede qabyldanǵan zań sheńberinde Áleýmettik kodekske, Salyqtyq kodekske jáne Mindetti áleýmettik medısınalyq saqtandyrý týraly zańǵa ózgerister engizildi. Ocy túzetýlerdiń esesine «e-Salyq Business» qosymshasynyń arnaıy salyqtyq júıesin qoldanatyndar úshin tólemderdi azaıtýǵa yqpal etetin birqatar sheshim qabyldandy. Munda jeke tabys salyǵyna, medısınalyq saqtandyrýǵa, áleýmettik saqtandyrýǵa jáne zeınetaqy jarnasyna tabystyń 1 paıyzyn aýdaryp otyrýǵa múmkindik qarastyrylǵan, – deıdi A.Sarbasov.
Osy jeńildetilgen rejim arnaıy salyqtyq rejimdi qoldanýǵa daıyn azamattar úshin tıimdi. «e-Salyq Business» salyq sheńberinde jeńildetilgen salyqtyq rejimniń artyqshylyǵy kóp. Bul rejimge kóshýdi oılaǵandar arnaıy salyqtyq júıemen salyq tóleıdi. Munyń dástúrli salyqtyq rejimmen salyq tóleıtinderden artyqshylyǵy kóp. Mysaly, dástúrli salyqtyq rejimdi qoldanatyndar aı saıyn kem degende 17 myń teńge tólep otyrady. Al jeńildetilgen salyq rejimi arqyly tabystyń 4 paıyzyn ǵana salyqqa tóleýge múmkindik týady.
– Eger tabys 200 myń teńgeniń shamasynda bolsa, onda dástúrli salyq rejimi boıynsha 17,5 myń teńge mólsherinde tólem tóleý qajet. Al jeńildetilgen rejim tabystyń tek 4%-yn tóleýge múmkindik beredi. Alda Memlekettik kirister komıteti, «Azamattarǵa arnalǵan úkimet», sondaı-aq Ulttyq bankpen birge ózara is-qımyldyń tıisti qaǵıdalaryn ázirleımiz. Jalpy, «Internet platformalar», «ınternet platformalardyń operatory», «tapsyrys berýshiler», «oryndaýshylar» uǵymdary zańnamalyq túrde bekitilgen. Qyzmetker men zańdy tulǵa arasyndaǵy ózara qarym-qatynas Eńbek kodeksi sheńberinde reglamenttelgen. Aıta ketetin taǵy bir aqparat, ınternet platformalarda jumys isteıtin jeke tulǵalarǵa qatysty salyq rejimderi qarastyrylǵan. Qanatqaqty jobaǵa 13 myń taksı júrgizýshisi qatysady degen boljam bar, – deıdi vıse-mınıstr.
A.Sarbasov túsindirgendeı, jumysshylar arnaıy salyq rejimin qoldana otyryp, jeke kásipker retinde tirkelýi qajet. Jyldyń sońyna deıin aqparattyq júıelerdi synaqtan ótkizý jáne ıntegrasııalaý tetikteri tolyq iske qosylady. Sebebi jyl sońyna deıin osy tetikterdiń barlyǵy tolyq jumys isteýi qajet.
