- Nıý-Iorkte álemniń segiz tanymal tennısshisiniń qatysýymen ótken UTS týrnıri aıaqtaldy. Júlde qory 1 mln dollardy quraǵan kommersııalyq jobaǵa Aleksandr Býblık te qatysty. Elimizdiń birinshi raketkasy shırek fınalda grekııalyq Stefanos Sısıpasty (3:2) utyp, jartylaı fınalda aýstralııalyq Aleks de Mınordan (3:1) aılasyn asyrdy. Biraq fınalda ol fransııalyq Gael Monfıske (1:3) ese jiberdi. Bas júldeni oljalaǵan sańlaq 301 000 dollardy alsa, aqtyq synda súringen Býblık 161 000 dollardy ıemdendi.
- Reseılik Ýmar Kremlev jetekshilik etetin Halyqaralyq boks qaýymdastyǵyn (IBO) qurdymǵa ketirý maqsatymen qurylǵan World Boxing uıymynyń qatary taǵy bes memleketpen tolyqty. Olar – Taıpeı, Pákistan, Býtan, Fıdjı jáne Ekvador. Sóıtip, atalǵan federasııanyń músheligine engen elder sany 42-ge jetti. Jýyrda olardyń qataryna Qazaqstan da qosylýǵa tıis. Sebebi IBO-nyń quramynda qalǵan komandalar aldaǵy Olımpııa oıyndarynan shettetiledi.
- Fýtzaldan ÝEFA Chempıondar lıgasynyń negizgi kezeńiniń jarys kestesi jarııalandy. Tórtinshi toptaǵy match myna komandalar arasynda ótedi: 22 qazan: «Semeı» – «Sportıng» (Portýgalııa), «Qaırat» – «Haladash» (Majarstan). 23 qazan: «Haladash» – «Sportıng», «Qaırat» – «Semeı», 25 qazan: «Semeı» – «Haladash», «Qaırat» – «Sportıng».
- Birikken Arab Ámirlikteriniń (BAÁ) Ál-Aın qalasynda bokstan jasóspirimder arasyndaǵy Azııa birinshiliginiń shymyldyǵy túrildi. Parsy shyǵanaǵynda Qazaq eliniń namysyn Madıra Jumahan (46 kg), Aıym Tańqybaeva (48 kg), Sıla Bıbolsynqyzy (50 kg), Jámıla Bolatbekqyzy (52 kg), Shyryn Manapova (54 kg), Aıǵanym Qadyrhan (57 kg), Sofııa Vashenko (60 kg), Alına Qudaıgenova (63 kg), Aısulý Muhıt (66 kg), Kámıla Ospanova (70 kg), Zarına Tolybaı (75 kg), Aıdana Ýbaıdollaqyzy (80 kg) jáne Sabına Jaqsylyq (+80 kg) syndy burymdylar qorǵaıdy.
- Taldyqorǵanda sadaq atýdan eresekter men jastar arasyndaǵy el chempıonaty márege jetti. Oǵan respýblıkamyzdyń barlyq óńirinen kelgen 200-ge tarta mergen qatysty. Jalpy esepte Jetisý oblysy jeńimpaz atansa, ekinshi oryndy Shymkent qalasy ıelendi. Al Aqmola oblysy úshinshi satyǵa taban tiredi.
- AQSh-tyń áıgili Forbes jýrnaly keıingi bir jylda eń kóp tabys tapqan TOP-10 tennısshiniń esimin atady. Bul kóshti Karlos Alkaras bastap tur. Joǵaryda aıtylǵan merzim aralyǵynda «Úlken dýlyǵa» sanatyndaǵy týrnırlerde tórt márte top jarǵan 21 jastaǵy ıspanııalyq oıynshynyń esepshotyna 42,3 mln dollar aýdaryldy. Odan keıingi oryndarǵa Novak Djokovıch (37,2 mln), Koko Gaýff (27,1 mln), Iga Shventek (26,7 mln), Iаnnık Sınner (26,6 mln), Rafael Nadal (23,3 mln), Danııl Medvedev (20,3 mln), Naomı Osaka (14,6 mln), Kasper Rýýd (13,9 mln), Arına Sobolenko (13,7 mln) jaıǵasty.
- Perý astanasy Lımada jeńil atletıkadan jastar arasynda álem birinshiliginiń jalaýy jelbiredi. Bul jarysta Faına Meıirmanova, Alına Chıstıakova, Irına Konısheva, Bogdan Goncharov, Krıstına Ermola syndy jerlesterimiz baq synaıdy.
- О́zbekstannyń Samarqand qalasynda eskek esýden ótip jatqan olımpıadalyq emes qashyqtyqtardaǵy álem birinshiliginde Marııa Brovkova K-1 jattyǵýynda 500 metrlik qashyqtyqty 02:09.731 mınýtta júzip ótip, qola medal ıelendi. Otandasymyz tek Ýkraına men Chılı sportshylarynan qalyp qoıdy.
