Qumar oıyndarǵa qarsy qujat

Kezdesýge Qarjy nary­ǵyn retteý jáne damytý agent­tiginiń tóraǵasy Madına Ábil­qasymova, Qarjy mınıstri Mádı Takıev, Týrızm jáne sport mınıstri Ermek Mar­jyqpaev, Ulttyq bank tór­aǵasynyń orynbasary Aqyljan Baımaǵambetov, Máde­nıet jáne aqparat vıse-mınıstri Qanat Ysqaqov qatysty.

Jıyndy ashqan agenttik tóraǵasy Dmıtrıı Malahov qoldanystaǵy zańnamada qumar oıyndar men lotereıa qyzmetin retteýge baǵyt­talǵan birqatar shara­nyń qaras­tyrylǵanyn atap ótti. Alaıda onlaın oıyn­qumar­lyq qoǵamda áli de ózektiligin joıǵan joq.

О́tken jyly agenttik Mádenıet jáne aqparat mınıstrligimen birlesip, TikTok-ta jappaı karta oıyndaryn uıymdastyrýdyń aldyn alǵan edi. Nátıjesinde, 300-den asa uıymdastyrýshy akkaýnty anyqtalyp, quqyqqa qaıshy kontenttiń efırin jedel túrde buǵattaýǵa múm­kindik beretin jasandy ıntellekt engizilgen bolatyn. Qazirgi ýaqytta Instagram-daǵy zańsyz lotereıalardy uıymdastyrýshylarǵa qarsy jumys júrgizilip keledi.

Sala basshysy agent­tik azamattardy zańsyz lote­reıalarǵa tartatyn adamdardy anyqtaýda Mádenıet jáne sport mınıstrligine kómek kórsetýge, sondaı-aq tólenbegen salyqtardy qosymsha esepteý úshin Mem­lekettik kirister komı­tetine aqparat usynýǵa daıyn ekenin málimdedi.

Búginde onlaın-kazıno­larǵa qarsy kúres boıynsha aýqymdy ári júıeli jumys júrgizilip keledi. Jyl ba­synan beri 6 myńnan asa zań­syz saıt buǵattalyp, kóshir­meleri táýlik ishinde joıyl­dy. Mamandardyń aıtýyn­sha, zańsyz onlaın-qumar oıyn­darǵa qarsy kúreste olardyń qarjylyq operasııalaryn toqtatý mańyzdy. «Sheteldik uıymdastyrýshylar qazaq­standyq oıynshylardan tikeleı aqsha qabyldaı almaıdy, sondyqtan olar jergilikti tólem uıymdary men bankterdi paıdalanady. Alaıda qumar oıyndar týraly jańa zań kúshine engennen keıin ınternet-kazınoǵa jasalatyn tranzaksııalar shekteledi. Al bank­ter men tólem uıymdary kómek kórsetkeni úshin jaýap­kershilikke tartylady», deıdi agenttik ókilderi.

Bul másele boıynsha QMA, Týrızm jáne sport mınıstrligi, Ulttyq bank birlesip jumys istep, zańsyz aqsha aýdarymdaryn anyqtap, buǵattaýdy júzege asyrady.

Jıyn sońynda qa­tysý­shylar qumar oıyn­darǵa patologııalyq táýeldilik­ten jas urpaqty qorǵaýǵa baǵyt­talǵan sharalar men is-qımyl algorıtmin qamtıtyn yntymaqtastyq týraly memorandýmǵa qol qoıdy.