Foto: ashyq derekkóz
«Barshańyzdy kezekti sessııanyń ashylýymen quttyqtaımyn! El ıgiligi úshin jasap jatqan qyzmetterińizge tabys tileımin.
О́tken sessııada jemisti jumys júrgizildi. Atap aıtqanda, Parlamenttiń ekinshi sessııasynda 102 zań qabyldandy. Onyń ishinde qoǵamdyq baqylaýǵa, adam saýdasyna qarsy kúreske qatysty zańdar bar. Sondaı-aq ǵylym jáne tehnologııa saıasatyn, jylý energetıkasyn, basqa da máselelerdi retteıtin zańdar kúshine endi», dep bastady Memleket basshysy.
Prezıdent atap ótkendeı, bıyl áleýmettik salaǵa, ásirese, balalardy qorǵaý isine aıryqsha kóńil bólindi. Máselen, Ulttyq qordan balalardyń esepshotyna qarjy aýdarýǵa qatysty zań qabyldandy. Sondaı-aq balalardy qumar oıynǵa tartqandar ákimshilik zań boıynsha jazaǵa tartylatyn boldy. Kámeletke tolmaǵan balalarǵa zorlyq-zombylyq kórsetkeni úshin beriletin jaza da qatańdatyldy. Balalardyń qaýipsizdigin qamtamasyz etýge, áıelder men balalarǵa qatysty qylmystyń aldyn alýǵa arnalǵan zań qabyldandy.
«Qazir kóptegen azamattyń moınynda birneshe nesıe bar ekeni jasyryn emes. Bul – óte ózekti másele, qoǵamdyq qater desek te bolady. Sondyqtan osy baǵytta arnaıy zańdar qabyldandy. Halyqtyń ál-aýqatyn jaqsartýǵa septigi tıetin basqa da kóptegen shara qolǵa alyndy. Sizder bul jumyspen tikeleı aınalysyp, halyqpen árdaıym tyǵyz baılanysta boldyńyzdar. Munyń bári «Halyq únine qulaq asatyn memleket» qaǵıdasyn ornyqtyrýǵa yqpal etetini sózsiz», dep eske saldy Qasym-Jomart Toqaev.
